Enseñansa y historia ta dos posibel victima di un peliger creciente
- Ta saca elementonan historico for di nan contexto pa crea thesis falso
- Realidad ta wordo ahusta na un proposito fiho sin base corecto
ORANJESTAD (AAN) Kico a pasa 30 di Augustus 1090, 5’or atardi na Aruba? Un pregunta ridiculo cu nos ta lanza simplemente pa por presenta un desaroyo dudoso, a base di Inteligencia Artificial, cu ta e nomber cu a wordo duna na e sabiduria cu un computer ta produci.
Den Inteligencia Artificial, ciencia ta entrega na hende entre otro, informacion di por ehempel loke historia ta entrega y contesta riba preguntanan specifico cu un persona tin.
Si kier establece cuanto tempo ta tuma pa alcansa San Nicolas for di Noord, mester di informacion di e vehiculo of e barco cu ta uza por ehempel. Pues mester di detayes pa yega na e contesta corecto y pa conoce detayes mester sa di kico ta papia.
Comunicacion a entrega na mundo e posibilidad pa ricibi informacion cu den pasado no tabata posibel pa hende entrega na otro.
Realidad ta cu avance di ciencia a aumenta e conocemento di hende ariba tur tereno y splicacion por wordo duna di por ehempel situacionnan di pasado cu a conoce cambio.
Inteligencia Artificial ta haci posibel pa hende uni tur tipo di conocemento den aparatonan cu ta produci un contesta ariba e pregunta cu hende haci, den un tempo record. Pero e contesta ta solamente basa ariba e pregunta cu hende a haci riba cierto punto. No por yega sin mas na conclusionnan pasobra bo a ricibi un contesta ariba un pregunta sin busca resto di informacion pa e materia cu kier pone na discusion.
Pa por indaga propiamente den un asunto mester di experto cu sabi di kico nan ta papia pa asina por pone e contesta cu un computer ta duna den su contexto real.
Nos ta bolbe na e distancia entre Noord y San Nicolas, cu por wordo cubri na diferente forma dependiente di entre otro e tempo den cual a cubri e trayecto.
Falta di informacion ta haci cu ningun sistema computeriza por duna informacion corecto y concreto y pa e motibo aki no por wordo uza como informacion cientifico.
Lamentablemente mas y mas ta topa cu situacionnan den cual kier aplica e facilidad di inteligencia artificial, sin e capacidad pa entrega e sistema cu mester duna e informacion, tur e detayenan cu e mester pa por yega na e conclusion total.
Na forma acelera mester tuma nota di ponencianan cu ta wordo lanza y ta wordo uza pa discusionnan importante, cu ta bandona realidad y no ta corecto pasobra no ta bolbe na aspectonan relevante den un situacion cu mester wordo bon investiga.
Si ta solamente den discusionnan den cual hende kier mustra otro con sabi nan ta, e peliger pa informacion falso cambia berdad di un situacion of ponencia, ta existi, lo no tin tanto problema.
Pero ora ponencianan determinante pa e impresionnan cu ta wordo crea hasta di convivencia di un comunidad, ta basa riba un pensamento sin e raiz di berdad y conocemento di e materia, situacionnan serio ta wordo crea a base di informacion falso cu resultado serio.
Cu preocupacion por nota cu historia general, mundial, riba tur tereno ta wordo falsifica pa motibo cu ta atende cu situacionnan cu ta wordo saca for di nan contexto completamente pa e simpel motibo cu e exponente di e materia presenta, no sa realmente di kico e ta papia y solamente kier alcansa su proposito personal of di su grupo directo.
E peliger ta cuminsa na edad hoben y asina tambe for di e momento cu un mucha, ta haya tarea pa produci relatonan ariba cierto temanan pafor di portanan di school, caminda tin seguridad cu maestronan conoce e materia educacional cu nan ta entrega. Pues ora expertonan riba nan tereno ta atende na forma profesional cu e entrega di informacion, no tin peligro.
Pero mas y mas ta topa cu hende cu pa motibo cu nan ta forma parti di cierto grupo di interes of filosofico, sin conocemento di materia y capacidad pa investiga loke nan ta atende cune, lanza thesis cu adulto y mucha ta considera berdad.
Simplemente ta subi computer, ta busca informacion isola di e momento y lugar cu kier ilustra, y ta deshaci di tur informacion basico cu expertonan riba nan tereno a base di estudio profundo, conoce.
Ta troce historia real y di e forma aki ta deshaci di e mentalidad, e base veridico y total, di por ehempel un comunidad y su balornan y normanan.
Un thesis falso ta wordo entrega door di Inteligencia Artificial cu ta bira asina Inteligencia Falsifica cu ladronicia di informacion saca for di contexto pa asina na demasiado momento, hustifica mentira cu ta wordo lanza.
Gruponan di interes ta falsifica y adapta realidad na nan proposito cu un base incorecto cu mester duna nan e imagen di sabio, cu nan no ta!
Un peliger creciente a presenta su mes pa medio di abuso di comunicacion door di personanan cu no tin autoridad pa atende cu temanan, cu ta exigi base profesional pa por sirbi interes general!
