Solange Tchong, PR di AZV:
- Di Juli pa Augustus y October pa Januari
ORANJESTAD (AAN) Solange Tchong, Relacionista Publico di AZV, den entrevista cu DIARIO a señala cu durante e añanan cu AZV tin di existencia, semper nan ta purba di tin un bon relacion cu tur e organizacionnan, esta specialista, docter di cas, etc.
“Pues, tin un bon colaboracion den sentido cu, principalmente, e docternan di cas cu nan no tey, ora cu nan bay sea cu vakantie, of sigui un curso den exterior, hopi biaha nan ta avisa AZV”.
Tchong a indica cu specialmente e specialistanan, no ta tur bo ta haya hopi facil. Kiermen, cu den specialistanan tin area unda bo por haya den temporada di vakantie, principalmente Juli cu Augustus, cu por tin un poco presion riba nan schedule, pasobra enberdad si nan traha nan vakantie planning, e pashent por haya su mes cu cancelacion pasobra e ora ey no tur ora nan ta haya reemplazo, facilmente.
“E palabracion cu AZV tin, eigenlijk, ta cu semper nos kier pa den e periodo cu nan ta ausente, sea si ta vakantie of pa sigui un curso den exterior, pa preferiblemente nan tin un reemplazo.
“Pero manera nos a papia den varios entrevista, nos a splica caba kico ta e reto no solamente den 2025, pero e siguiente añanan cu nos na Aruba ta confrontando escasez pa loke ta e profesionalnan medico. Anto e escasez ta den diferente area, no solamente den diferente specialismo, pero hasta den e parti di cuido di pashent. Pues, nos ta wak den e sector medico, lo ta e docternan pero tambe e asistentenan di docter, esnan cu ta cuida pashent, eynan por wak cu tin escasez y ta haya e reto di bay busca mas hende pa profesionaliza nan mes pa bay traha den e areanan ey”, Solange Tchong a señala.
El a agrega cu esey ta e motibo pa cual no tur specialismo ta haya reemplazo. Por ehemplo, actualmente tin tardanza pa haya cita den e parti di Ginecologia pa motibo cu algun di e docternan, sea ta cu vakantie, of no a haya reemplazo facil, pues tin un presion eynan.
Tjong a señala cu, historicamente, desde cu AZV a wordo introduci na 2001, den e periodonan Juli-Augustus, cu ta e periodo di vakantie largo, pero tambe entre October y December pa Januari, ta periodonan unda generalmente, AZV tambe ta haya e señal di clientenan cu ta ripara tardanza, cu e docter no a haya reemplazo of ta hay’e te cu tal fecha.
“E ta algo conoci y tur instancia, hasta Hospital, ImSan, AZV, y bestuurnan y otro instancianan grandi, sigur ta purba di yuda lo maximo, dentro di e situacion ey den e periodonan menciona”, PR di AZV, Solange Tchong a remarca.
