Mainta trempan na Canashito
- Cu kemadura severo nan a ser hiba urgente pa Colombia
ORANJESTAD (AAN): Tabata Diaranson mainta pa exactamente 6:30 am, net ora cu e prome rayonan di solo a cuminza sali, cu yamada a drenta na Central di Polis, cu e boletin serio cu un explosion a caba di socede na e planta di Thiel Corporation situa na Canashito.
Mesora Central di Polis a pone patruyanan di Santa Cruz na altura pa cuminza mobilisa pa eynan. E melding a drenta cu informacion adicional, cu tin 3 victima y ta pidi pa Ambulance yega eynan cu maximo urgencia. Tambe a pidi pa presencia di Cuerpo di Bombero.
E prome unidad di Polis cu a yega eynan, a bin topa cu un situacion cu trahadornan ta den panico. Pero nan a informa Polis cu enberdad tabatin 3 persona cu herida bastante grave y traumatico, pero como cu no kier a warda, e ora cu auto particular di demas trahador di Thiel Corporation, a subi caya y nan a mobilisa cu e heridonan rumbo pa ImSan te na San Nicolas.
Habri caminda pa Ambulance: Mientras tanto na yegada na ImSan, a mira e heridanan grave y quemadura intenso riba nan cuero, cu a dicidi mesora pa laga tres unidad di Ambulance move for di ImSan rumbo pa Dr. Horacio Oduber Hospital pa tratamento mas avanza.
Pa yuda Ambulance cu e trafico druk di Diaranson mainta, tanto unidadnan di Polis di San Nicolas, Santa Cruz y di Oranjestad a sera caminda pa asina tur tres Ambulance por a yega mas lihe posibel hospital cu e victimanan.
Mientras tanto na e planta di Canashito, a bin compronde cu tur tres trahador a haya quemadura, ora cu un tubo di azeta cayente na e planta di asfalt, debi na acumulacion di gas lo a explota y e azeta a spuit tur rond y plama pa basha riba nan curpa, lagando nan grita di dolor.
Bomberonan a yega y a nota cu no tabatin ningun candela, y cu ya tur azeta a plama basha abao, pues tin nada mas bao presion den henter e planta cu por genera mas peligro. A paga e planta pa asina tur ekipo por a fria.
Riba di 50% kemadura: E victimanan cu kemadura di 50% na nan curpa, pues algo hopi grave, a wordo poni mesora den Intensive Care Unit, y specialistanan a indica mesora cu nan tin di bay cu urgencia na un Hospital cu ta specializa den ‘Burn Unit’. Esey ta algo cu Aruba no tin.
Mesora den consulta cu AZV, a dicidi cu ta bay transporta nan cu Air Ambulance pa Hospital na Colombia. Pero ta conoci cu cada Air Ambulance por transporta solamente 1 pashent. Pues e ora a manda busca 3 Air Ambulance mes.
Departamento di Dienst Technische Inspectie tambe a mobilisa pa e planta na Canashito pa asina haci nan investigacion di e caso serio aki. A compronde cu e tres trahadornan herida, uno ta naci na Aruba, otro ta naci na Colombia, y e di tres ta naci na Peru. Pero nan tin hopi tempo biba y trahando eynan.
