ORANJESTAD (AAN) – Minister Presidente demisionario y Formador di Gabinete Wever-Croes II, a duna un relato tocante e reunionnan den e cuadro di formacion, cu a tuma lugar diamars.
E mandatario a menciona cu e dia aki el a reuni cu 14 diferente stakeholders, durante e dia. E prome tema cu e tabata tin riba agenda ta e sindicatonan unda cu el a reuni cu ocho sindicato di cual seis ta representa trahadornan di gobierno, esta: SEPPA, TOPA, SIMAR, SPA, SADA y SIMBA, y tambe a reuni cu STA y FTA.
A base di e reunionnan aki Formador Wever-Croes por a scucha kico ta importante pa nan den un acuerdo di gobernacion nobo y e siguiente periodo gubernamental.
Wever-Croes a splica cu nan a trece puntonan dilanti cu ta regarda nan miembronan pero tambe cu ta concerni comunidad en general.
E sindicatonan a enfoca mas tanto riba e bienestar y e posicion di e trahadornan.
Seguidamente Formador a reuni cu Comerciantenan Uni di Aruba (CUA) y despues cu SETAR, den cuadro di economia y desaroyo economico, kico asina ta importante.
CUA cu ta forma pa empresanan chikito y mediano a indica kico nan ta desea di mira, y di SETAR a scucha kico ta su vision pa futuro, con e compania ta bay atende cu e cambionan grandi y acelera den tecnologia y alavez mantene e compania cu ta un cu ta haci ganashi, pa e keda draai stabil y sigui duna bon servicio tambe.
E dignatario a menciona cu tambe nan a atende cu e tema di salud, cu a cuminza siman pasa caba, y a reuni cu FMAA, cu ta “Fundacion Maneho Adiccion Aruba” y SPD “Sociaal Psychiatrische Dienst” unda a delibera riba e problemanan social psiquiatrico, tema cu tambe a toca siman pasa a haci den reunion cu Respaldo.
Pero tambe a papia tocante adiccion, y FMAA y SPD a presenta un vision con nan por traha hunto y brinda cabes na e problemanan mental cu nos tin den nos pais, y nan a elabora tambe riba kico tur nan ta haciendo caba como organizacionnan, specialmente SPD, cu ta e departamento cu ta trata e personanan cu ta haya nan mes den cualkier problema di salud mental den famia, of cu pashentnan cu mester atende cu esaki. E dignatario a subraya cu esaki tabata un presentacion hopi impresionante.
Formador a sigui informa y a splica cu tambe a reuni cu Asociacion di Dentista, pa asina scucha di nan banda con nan ta mira e desaroyonan y expresa cual ta nan preocupacionnan riba gastonan di cuido dental, e hecho cu no tur cos ta wordo cubri pa AZV y kico ta e futuro pa e area aki di salud, cual ta hopi importante tambe. Finalmente, a cuminza cu e reunionnan riba medio ambiente, y a reuni cu SERLIMAR, y a papia riba e compania mes cu manera ta conoci, a wordo poni riba un sorto di curatela financiero, desde aña pasa na Mei, door di e anterior minister di medio ambiente.
Formador kier a sa con e ta bayendo pasobra e no kier mira cu un compania estatal bay bancarota. Formador a bisa cu e situacion ta keda hopi critico, no obstante e ultimo lunanan aki Serlimar a logra cierto avancenan den e tema financiero y organizativo, pero cu esey ta suficiente pa scapa e compania aki di bancarota, Formador no sa ainda.
