ORANJESTAD (AAN): Riba Diaranson mainta e candidata Solangel Dinmohamed Lacle cu den eleccion di Juni 2021 a logra 189 voto,
a tene un conferencia di prensa unda por bisa cu pa prome biaha pueblo di Aruba a haya chens di scucha e dama aki expresa su mes di e mal hecho cu Partido MAS a haci cune pa lage afo di Parlamento. Pasobra esnan den Partido a firma un protocol (manera algun otro partido tambe a haci), pa dicidi cu esnan cu haya mas voto lo tin preferencia pa bira Parlamentario.
Pero pa awor ya tur hende sa, cu e lider di Partido MAS a prefera di hunga pa ciego, a lubida riba e protocol firma, y a djis bira Parlamentario y a rek cune un dama cu hopi hende na Aruba ta yamando caba ‘Gunn-77’, esta Aquannette M. Gunn cu apenas a haya 77 voto.
Apenas siman pasa riba Social Media, por a lesa un monton di reaccion di publico riba un noticia publica encuanto Gunn, y mayoria di hendenan cu a comenta a mustra nan desacuerdo cu loke Gunn-77 a haci pa asina usa excusa fofo pa logra haya asiento den Parlamento. Y tur esaki cu backup di e lider di partido.
Diaranson mainta, señora Dinmohamed-Lacle na un forma structura, den idioma cla, y na un forma hopi comprendible y cu ta capta atencion di tur hende, a splica di comienzo kico a socede cune y cu Partido MAS a djis lage afo.
Inmediatamente e comentarionan riba Social Media a cuminza papia hopi positivo mes di Solangel Dinmohamed-Lacle, pues cu su postura y forma di comunica tabata ideal pa a bira un bon Parlamentario. El a demostra cu e ta un persona cu ta cla pa lucha pa tur loke e ta pensa ta bon, y ta bin cu documento y backup pa defende su ponencia. Algun hende hasta a bisa cu e lo por a bira un bon Parlamentario, pero lamentablemente el a bay eleccion riba lista robez.
Publico a mustra di tin compasion cune, y ta haya cu loke e lider di MAS a haci cune tabata un ‘abuso’, y nan ta contento cu el a tuma rumbo pa Huez, aunke Corte kizas lo bay djis laba man y mustra cu e Kiesverordening ta mustra tur cos cla y raspa.
Solangel Dinmohamed-Lacle a emiti un imagen cu e ta un persona hopi habri, facil pa combersa cune, y e tin su pensamentonan fuerte y sigur bon informa di loke e ta papiando di dje.
Aunke e no ta den Parlamento, toch awor pueblo a mire pa prome biaha cu e ta un strea briyante nobo, y sigur e por wordo mira pa cualkier proximo eleccion como candidato aun mas fuerte. Pasobra loke publico a mira di Gunn-77 te cu awor, ta nada impactante y mas bien parce ora bo ta verf un muraya y bo ta sinta wak con e verf seca.
Ta di lamenta cu algun persona a purba di comenta cosnan fo’i sla, xenofobico, y informacion incorecto. Berdad cu Solangel no a nace na Aruba, pero si bo a mira e lista di candidatonan pa eleccion 2021, tabatin mas cu tampoco no a nace na Aruba. Pues tin di keda consecuente si ora di comenta cosnan fo’i sla.
