Inspeccion di Remedi ta haciendo control riba benta di remedinan ilegal y hasta algun boet a cay

Inspector Roselynn Angela:

ORANJESTAD (AAN)—Den entrevista cu Inspector di Remedi, señora Roselynn Angela, el a indica na DIARIO cu e tema di remedi ilegal ta un punto di atencion pa Departamento di Inspeccion di Remedi.

El a bisa cu for di aña pasa a drenta hopi melding, y Inspectie a cuminza controla mas streng riba e meldingnan cu nan ta haya. Nan a bay controla den fruteria, supermarket, y como cu Inspectie tin derecho di duna advertencia y boet, tin boetnan cu a wordo duna.

“E no ta solamente e parti ilegal tambe cu ta wordo bendi caminda cu no mag. Nos a acerca e importadornan bisa nan e consecuencianan pa nan. Esey ta e parti di e negoshinan. E parti di uzo personal, bo ta wak den facebook ta yenando constantemente cu propaganda di remedi cu ta wordo bendi y cu ta remedi cu mester guia d un doctor. Esey nos tambe ta bezig cu otro departamentonan, entre otro, Douane, pa bin cu un regulacion mas estricto over di eseynan”, Inspector señora Roselynn Angela a señala.

Inspector Angela a splica cu tin remedinan legal cu por wordo treci na Aruba, y esey ta pa compania cu mester tin un vergunning di minister. E vergunning por ta mara na diferente rekisito pa warda e remedinan bon. Nan mag bende nan na botica y e botica mag bende nan na pashent.

“Tin remedinan cu por wordo bendi via supermercado; eseynan ta remedinan cu tin menos riesgo pa hendenan y cu no mester guia di un docter. P’esey nos tin un comision di registracion y e ta esun cu ta dicidi na unda e remedi ta bay, di esey ta depende na unda e remedi ta wordo bendi”, señora Angela a indica.

E parti ilegal ta remedinan cu no ta drenta via e caminda legal, cu ta via un importado. Un persona cu tin un permiso pa trece remedi di afo, por ehemplo cu ta bay pa tratamento na Colombia, Hulanda of Merca, tambe tin derecho di trece su remedinan aden. “Eynan hopi biaha nos ta pidi cierto documentonan pa confirma cu ta pa e persona ey cu ta siguiendo un terapia of tratamento cu el a haya di afo, pero cu e condicion cu ora yega Aruba e tin cu bay cerca su docter akinan y e tin cu sigui uza e tratamento aki na Aruba. No t’asina cu nan por sigui busca e remedinan afo”, Inspector Roselynn Angela a señala.