ORANJESTAD (AAN): Entrante september, studiantenan di e parti Caribense y Europeo di Reino por aplica pa e beca conoci como ‘Koninkrijksbeurs’.
E beca aki ta permiti bo realisa un stage of intercambio di estudio riba un di e 6 islanan of Hulanda pa un periodo de 21 dia te cu 6 luna. E periodo di aplicacion ta extende te cu 14 di october 2025. E areglo aki ta conta pa studiantenan di nivel MBO 3/4, HBO y WO cu ta studia fulltime den un programa reconoci.
Oportunidad unico: E beca ta brinda e studiantenan e oportunidad pa mira mas leu di frontera di nan propio pais, adkiri experiencia den un contexto diferente y desaroya nan mes academicamente y personalmente. E prome studiantenan ya a haci uzo di e beca aña pasa.
E beca ta cubri gastonan di biahe, vivienda y matencion, entre otro cos. Suma di e beca ta comparabel na beca Erasmus+ y ta yega na un maximo di €5.900 pa studiante Caribense. Esaki ta haci cu e ta mas factibel financieramente pa e studiantenan adkiri experiencia mas leu di e fronteranan.
Seleccion pa sorteo: Cantidad di beca disponibel ta limita y ta varia segun isla. E seleccion ta realisa door di un sorteo. E studiantenan interesa por manda un e-mail na This email address is being protected from spambots. You need JavaScript enabled to view it. of bishita webpage pa obtene mas informacion:
Contribucion pa exito di estudio y igualdad di oportunidad: Koninkrijksbeurs ta un di e medidanan destina pa aumenta exito di estudio y igualdad di oportunidad di studiantenan Caribense. E beca ta ofrece e studiantenan oportunidad pa familiarisa temporalmente cu e estudio of realisacion di un pasantia den otro parti di Reino prome cu nan inscribi pa un programa di continuacion completo.
Mehora exito di estudio ta un prioridad riba agenda di e ministernan di educacion di Aruba, Curaçao, Sint Maarten y Hulanda. Riba peticion di e ministernan, e ekipo di e programa di Strategic Education Alliance (SEA), strategiceducationalliance.org a haya e tarea pa dedica su mes structuralmente pa fortifica exito di estudio di studiantenan Caribense durante tres aña.
