Minister Geoffrey Wever
ORANJESTAD (AAN): Minister di Finansas, Asunto Economico y Sector Primario, mr. Geoffrey Wever, lo participa den e prestigioso Private Placement Industry Forum Europe (PPIF-Europe) cu lo tuma lugar e siman aki na Amsterdam.
E evento aki ta un di e esunnan mas importante den continente Europeo pa emisor di obligacionnan y inversionistanan institucional, y lo reuni mas cu 160 actornan financiero for di Europa y Merca. E evento ta ofrece un plataforma unico pa presenta y posiciona Aruba riba e mercado financiero europeo.
Diversificacion: Pa mas cu un decada Aruba ta logra mantene un reputacion fuerte como un emisor confiabel y atractivo di obligacionnan riba mercado Mericano. Pero, segun Minister Wever, diversificacion di portafolio ta esencial pa maneho responsable di debe externo di nos pais. Actualmente, mayoria di obligacionnan di Aruba ta den man di inversionistanan institucional Mericano.
“Diversificacion di portafolio ta un principio basico di maneho responsable di debe. E panorama economico global ta cambiando y nos tin cu anticipa riesgo. E accesibilidad na mercado Europeo ta necesario pa fortifica stabilidad financiero di nos pais,” segun Minister Wever.
Vision di Gobierno: Participacion den PPIF-Europe ta un paso concreto den vision di Gobierno pa amplia y diversifica fuentenan di financiamento, sigurando cu Aruba ta mantene un posicion internacional fuerte, confiabel y competitivo.
Minister Wever a agrega: “E participacion den PPIF-Europe ta un paso strategico den un plan mas amplio pa fortifica nos base financiero, proteha stabilidad di nos pais y crea mas confianza den Aruba como un socio serio den mercado global.”
Gobierno di Aruba ta compromete pa sigui busca oportunidadnan cu ta amplia capacidad pa maneho financiero prudente di pais y sigura un crecemento economico sostenibel.
