DIMP: “Entrante 1 october control ta cuminsa”
ORANJESTAD (AAN) — Den conferencia di prensa reciente, señora Meverly Romano, Relacionista Publico di Departamento di Impuesto (DIMP) a informa tocante e cumplimento di e contribuyentenan, encuanto pago di impuesto riba plachi di auto, señalando cu dia 1 di october proximo tur auto cu ta trafica riba caminda publico mester tin e plachi blauw cu blanco, cu DIMP a parti.
El a reitera cu na e momentonan aki tin 7554 number di auto cu no a paga nada riba dje. No tin pago di aña 2025. 6681 auto tin pago riba e prome mita di aña 2025 y e total cu no a cumpli te e momentonan aki ta 14235.
“E grupo aki nos ta yama nan ‘non complier’ y esaki ta representa 14.8%. E grupo aki di 6681 a paga e impuesto di e prome mita di aña, pero mientras tanto 30 di juni, cu tabata e deadline pa paga e impuesto di e di dos mita di aña a pasa, y nan ta ‘non complier’ aworaki. Nan no a cumpli cu e pago di 2%. P’esey tambe e incumplimento total di 14.235 number cu no tin pago manera mester ta di e impuesto di aña 2025, ta representa 14.8%”, Meverly Romano a reitera.
KICO TA E SIGUIENTE PASO?
Señora Meverly Romano a reafirma cu DIMP a caba di parti e plachinan masalmente, durante e luna di September aki, y esey ta nifica cu entrante 1 di october tur vehiculo di motor cu ta trafica riba nos careteranan publico, mester tin e plachi blauw cu blanco cu Departamento di Impuesto a parti.
“Esey ta nifica tambe cu dia 30 di september aki, ta e ultimo dia cu por core cu plachi di aña 2020, cual ta e plachi cora cu blanco. Esaki ta algo masha importante pa nos automobilistanan, esnan cu falta pa haya nan plachi, pa nan tene cuenta cu esey, pasobra e controlnan ta bat start”, Meverly Romano a señala.
DIMP ta sigui otorga plachi y e proceso ta continua normal. “Dus, mester haci un cita, upload e documentonan y nos ta parti e plachinan”, señora Romano a enfatisa.
