Innovacion den agricultura ta brinda oportunidad pa contribui na produccion local

Prome Minister Mike Eman

ORANJESTAD (AAN): Como parti di Accion di Bario, Prome Minister Mike Eman, hunto cu Parlamentario Stephany Sevinger, a bishita 297 Farm na Yara, Savaneta, caminda nan a haya un recorido door di propietario Gregory Fung-a-Fat y a conoce mas di cerca e manera cu tecnologia ta uza pa produci alimento localmente.

A conta cu 297 Farm a cuminsa na 2017, inicialmente cu cultivo den un sistema indoor pa explora ki tipo di produccion por funciona bou di condicionnan di Aruba. Despues di periodo di COVID, e iniciativa a amplia y a incorpora tecnologia mas avansa y adapta na nos clima.

Actualmente e farm ta conta cu dos greenhouse, caminda alrededor di 25.000 mata ta creciendo y nan ta produci nuebe variedad di lechuga. Segun Fung-a-Fat, interes pa e producto local ta positivo: demanda actualmente ta mas halto cu loke e farm por produci. E reto ta pa sigui aumenta produccion di manera eficiente y sostenibel.

Premier Eman a expresa impresion cu e desaroyo cu el a mira durante e recorido y cu e manera cu 297 Farm a logra adapta tecnologia na realidad di un isla seco manera Aruba.

Segun Premier, agricultura tradicional ta parti di Aruba su historia y herencia, pero innovacion ta brinda oportunidad pa complementa esaki cu metodonan moderno cu por contribui na produccion local.

Eman a aprecia tambe e disposicion di Fung-a-Fat pa comparti su experiencia y conocemento cu otro personanan interesa den agricultura. Pa Premier, ehempelnan manera esaki ta demonstra cu, apesar di nos condicionnan climatico, Aruba tin oportunidad pa sigui desaroya su produccion local mediante conocemento, tecnologia y colaboracion.

Durante e bishita no solamente a papia di loke ta bay bon. Fung-a-Fat a comparti tambe algun di e retonan cu productor ta encontra den sector primario. El a reconoce e esfuersonan cu ta wordo haci pa sostene sector y a expresa confiansa cu, mas dialogo y colaboracion, por sigui crea condicionnan pa e sector desaroya.

Parlamentario Stephany Sevinger a destaca precisamente e importancia di e parti aki di e bishita. Segun Sevinger, pa por contribui na solucionnan ta necesario tende directamente di productor unda e obstaculonan ta y kico nan ta experimenta den practica. E informacion y experiencia cu ta comparti den tereno por despues contribui na e conversacion riba futuro di sector.

Pa Prome Minister Eman, e bishita a brinda un ehempel concreto di con iniciativa local y tecnologia por encontra otro den agricultura. El a desea Gregory Fung-a-Fat y su team hopi exito cu e desaroyo di 297 Farm y a reafirma importancia di sigui brinda atencion na potencial di sector primario.

Accion di Bario ta sigui crea e contacto directo cu comunidad: no solamente pa mira loke ta logra, sino tambe pa scucha, comprende e realidad den tereno y busca con Gobierno, Parlamento y comunidad por sigui traha hunto.