Suzette Dumfries cu Plan Dumfries 2030:
ORANJESTAD (AAN)-- Suzette Dumfries “Nation Builder”, siguiendo cu su informacion tocante su plan di desaroyo pa San Nicolas (Plan Dumfries 2030), cual a haya sosten di Abogado Dello Gomes, ken kier participa di e plan aki, a expresa cu e ta admiti cu esaki a bay na un forma hopi lihe, pero ta motive y dune e siguranza cu e ta bayendo riba e caminda corecto y cu e lo mester sigui hunto cu tur e actornan aki pa logra e meta.
“Mi a cuminza cu esaki usando e ruta institucional, kiermen mi no a bay bati riba ningun partido politico, e no tin nada di politica, pero mi ta hopi conciente di e hecho cu e ehecucion di e plan logicamente mester tin e stakeholders, pero mester tin un relacion cu gobierno tambe. Den esey mi ta pone hopi esfuerzo mes den dje.”
El a sigui bisa: “Na final di dia, mi a contesta un pregunta hopi importante, esaki no ta solamente pa San Nicolas. Ami como Economista por bisa cu no solamente San Nicolas no a wordo desaroya. E prosperidad y progreso a wordo crea y ta concentra na Noord. Nos tin cu ta hopi claro, Rancho y Dakota tampoco a desaroya.”
“Nos tin cu eleva e combersacion riba e desaroyo nacional di Aruba, pues, na nivel nacional. Nos tin cu ta conciente di e hecho cu e tempo pa distribui prosperidad pa henter Aruba ta awo! Locual mi vision ta, pa laga nos cuminza cu San Nicolas, pasobra San Nicolas ta e oportunidad mas grandi cu nos tin. Mi no ta bisa cu esey ta e meta, pero por ehemplo pa diversifica nos producto turistico y tambe pa crea oportunidadnan pa crea industrianan nobo. Mi ta kere cu e parti industrial di San Nicolas no mester completamente wordo elimina. Mi no ta bisa cu mester un refineria, pero un economia industrial, tin espacio p’esey.”
“Mi meta ta wak si e structura aki cu nos a crea pa desaroyo nacional, realmente por wordo aplica na henter Aruba. San Nicolas ta un comienzo, pero no e final”, Suzette Dumfries a conclui.
