Entrante 18 juli 2022 --- *Ainda ta acepta e carta firma pa ambos mayor
ORANJESTAD (AAN): Imigracion Aruba a informa riba su maneho pa loke ta viahando cu muchanan menor di edad.
Nan ta informa cu teniendo consideracion pa loke ta e corto tempo pa algun mayor cu ta viahando sea awe of den e transcurso di e siman, cu ainda Inmigracion Aruba ta acepta e carta firma di ambos mayor.
Tene na cuenta cu esaki ta valido pa e viahenan cu ta sosode den un tempo cortico den e dianan aki cu no por logra cu e papeleonan necesario entre otro e acta di nacemento cu por dura un siman.
Entrante 18 juli 2022 Inmigracion Aruba lo implementa e proceso nobo.
Por lesa e beleid nobo di Inmigracion Aruba hunto cu e post aki, aki rato tambe ta bay tin e formulario nan riba nan pagina.
INMIGRACION A INFORMA:
Inmigracion Aruba a cuminsa c’un proceso nobo, en bista cu vakantie grandi ta den cuminsa. Den e temporada aki hopi hende ta viahando y den cierto casonan, tin un menor di edad envolvi.
Director di Inmigracion, Andrew Hoo, a splica cu e proceso semper tabata ta cu den un caso asina unda cu ta biaha c’un menor di edad, semper nan tabata tin mester di un carta, firma pa un di e mayornan, unda cu ta duna autorisacion pa asina sali for di Aruba cu e menor di edad.
Esaki semper tabata trece stagnacion na ora di control, hopi biaha esey tabata trece confusion, retraso y perdemento di vuelo y tur e consecuencia cu esaki ta bin cu ne. Teniendo esey na cuenta, Inmigracion Aruba a introduci un formulario nobo, un maneho nobo cu ta tene cuenta cu derecho di mucha, pa preveni secuestro di mucha.
Tabata tin hopi caso unda cu un mayor of cualkier hende cu ta probecha di e situacion y ta bandona Aruba cu e mucha menor di edad sin conocemento di e otro mayor.
Director di inmigracion, Andrew Hoo, a indica cu pa cualkier otro pregunta pasa libremente na nos oficina na Vondellaan 25.
https://diario.aw/categories/noticia/general/inmigracion-aruba-lo-implementa-proceso-nobo-riba-viahamento-cu-menornan-di-edad#sigProIdb4c40add6f
