Prijs di petroleo ta mantene mundo den e incertidumbre grande --- *Ancianonan y gruponan financieramente debil enfrente peliger --- *Pensioen Hulandes tambe afecta den e situacion financiero mundial
ORANJESTAD(AAN)- Mundo ta leu for di resolve su problemanan mas serio, cu cada rato ta wordo afecta pa desaroyonan nobo na paisnan grandi y e prijs di petroleo cu no conoce stabilidad.
DIARIO ta den contacto sumamente estrecho cu su informantenan internacional a base di informacionnan internacional serio, cu ta exigi pa tur sector na Aruba den nan seno y conhuntamente cuminsa discuti loke tin dilanti porta.
Prijs di petroleo sigur ta duna prueba di e situacion mundial, cu segun expertonan mundial ta causante y lo keda causante di desaroyonan grave cu sigur lo afecta na un forma serio e grupo di ancianonan y gruponan financieriamente debil mundialmente.
Expertonan ta mustra riba tur e situacionnan internacional, cu ta factornan di importancia pa por midi kico ta dilanti porta.
Sin kier bati alarma grandi informantenan di DIARIO a adverti, cu sigur e grupo di ancianonan, gruponan cu ta prepara pa retira, companianan den situacionnan financiero dificil, mester tene cuenta cu e situacion mundial economico, cu ta marca pa tension grandi.
E peliger cu e gruponan di comunidad cu ya ta den problema lo conoce situacionnan mucho mas serio na final di 2022 y entrada di 2023, ta sigui insisti.
Gobiernonan rond mundo tin problema pa atende cu inflacion ta cu hopi medida cu por tuma pa stop inflacion, directamente lo causa mas inflacion of caida economico peligroso cu lo afecta poblacion mundial.
Un aumento significante di pobresa ta loke ta wordo spera dor di organisacionnan y expertonan mundial, cu ta sigui adverti pa e resultado cu caida economico na paisnan grandi lo tin pa paisnan chikito, sigur paisnan cu debenan grandi y paisnan sin un base economico solido.
Mercado internacional di petroleo a duna prueba ayera di instabilidad. Prijsnan ta baha y prijsnan ta subi, mientras expertonan ta bisa cu prome cu fin 2023 por spera cu petroleo lo por percura pa sorpresanan amargo pa economia mundial den e spiral negativo actual.
E sistema cu varios pais ta adopta pa subi tazanan di interes riba debe, segun expertonan internacional tin resultado opuesto di loke nan kier alcansa y hustamente lo yuda mas inflacion.
E caida financiero mundial ta un hecho, manera informantenan ta indica. Prijs pa energia, manera prijs pa petroleo no ta duna indicacion pa mehoracion mientras energia alternativa cu mester reemplasa petroleo, ainda no por duna un bista cla di loke lo pasa den futuro.
“Estilo di bida ta wordo afecta,” informantenan a spierta mientras ayera Europa tabata trata di indica cu e no ta den zona di problema.
Hopi atencion pa caida ayera di Euro enfrente Dollar, cu pa Aruba sigur ta importante ya cu Aruba ta mara na Dollar.
Pa personanan cu ta depende di entrada di Euro manera personanan cu ta pensionado di Hulanda, e situacion sigur tin resultado riba e suma cu nan ta ricibi mescos cu productonan Hulandes, cu mester wordo importa.
Mester tene cuenta cu cantidad di persona cu den pasado a biba na Hulanda pa ricibi pensioen di Hulanda y awor na Aruba ta ricibi pensioen na Euro.
DIARIO lo sigui informa riba tur particularidad mundial y local den un mundo cada rato mas dificil.
