Parlamentario Jennifer Arends-Reyes:
ORANJESTAD (AAN): Cu inicio di un aña escolar nobo acercando, hopi famia ta den pleno preparacion pa cumpra uniform, sapato, tas, material escolar y tur loke nan yiunan tin mester.
Parlamentario Jennifer Arends-Reyes ta enfatisa cu, aunke e periodo aki ta uno di entusiasmo pa muchanan, pa hopi mayor e ta bin cu un presion financiero considerable.
“Como mama y tambe como profesional cu ta bin di e mundo di Enseñansa mi conoce e realidad. Inicio di aña escolar ta trece alegria, pero tambe hopi gasto Arends-Reyes a declara.
P’esey e parlamentario ta considera e pakete di sosten financiero social anuncia door di Gobierno di Aruba un ayudo necesario y importante pa yega na famianan cu mas tin necesidad.
Durante un conferencia di prensa, Prome Minister mr. Mike Eman y Ministro di Asuntonan Social, Salud Publico, Cuido di Adulto Mayor y Adiccion drs. Mervin Wyatt-Ras a indica cu e aumentonan ta basa riba un evaluacion di costo di bida y di e necesidadnan cu famianan ta enfrenta diariamente.
Pa Arends-Reyes, politica social mester traduci den ahustenan cu hende realmente por sinti den nan bida diario.
“Nos por papia di cifra, crecimiento y progreso, pero na final e pregunta importante ta: ciudadano ta sinti esaki den su cartera y na su cas? Desaroyo di un pais tambe mester yega na mesa di e famia y mester yuda unda e necesidad ta real.”
E parlamentario ta enfatisa cu sosten na entrada escolar no ta solamente un ayudo financiero, sino un inversion directo den igualdad di oportunidad.
“Mi ta pensa riba e mucha cu ta emociona pa drenta klas cu su uniform, su tas y su materialnan prepara. Ningun mucha mester sinti fastioso simplemente pasobra situacion financiero di su famia ta dificil. Un bon comienso escolar mester ta posibel pa tur mucha.”
Segun Arends-Reyes, Gobierno tin responsabilidad di sigui evalua costo di bida y adapta sosten social na e situacion cu ciudadano ta enfrenta.
“Cada sosten adicional ta conta, pero nos no por para aki. Nos mester sigui scucha famianan, sigui mira unda presion ta mas grandi y sigui busca solucionnan concreto cu duna ciudadano mas espacio den su presupuesto.”
Finalmente, Arends-Reyes ta desea tur mucha, mayornan y personal di enseñansa exito pa cu e preparacionan pa inicio di e aña escolar nobo.
“Mi deseo ta cu cada mucha por drenta su klas cu entusiasmo, confianza y dignidad. Ora nos crea oportunidad pa nos muchanan, nos ta fortalece famia. Y ora nos fortalece famia, nos ta fortalece Aruba.”
{gallery}Inicio di anja escolar ta trece alegria, pero tambe hopi gasto{/gallery}
