Fundacion Educar pa Transformar ta presenta su website oficial

ORANJESTAD (AAN): Fundacion Educar pa Transformar (FET) ta anuncia oficialmente e lansamento di su website, www.fundacionfet.org, cu a bira disponible pa publico desde 1 di augustus 2026. 

E lansamento ta marca un paso nobo den e desaroyo y presencia digital di e Fundacion, haciendo su informacion, capacitacionnan y actividadnan mas accesibel pa e comunidad.

Como parti di e crecimiento di e Fundacion, desde 3 di juli 2026, Kimberly de Cuba a bira miembro di e directiva di Fundacion Educar pa Transformar. Como parti di su responsabilidadnan, a encarga cu e creacion y desaroyo di e pagina web oficial di e Fundacion.

A pesar di e periodo cortico disponibel, De Cuba a logra completa e proyecto dentro di e plazo, permitiendo cu e pagina web por a ser lansa oficialmente riba 1 di augustus.E website nobo ta ofrece informacion tocante e Fundacion, su mision, e diferente cursonan, actividadnan social, stage y graduacionnan. Interesadonan tambe por conoce mas tocante e Programa di boluntario y registra nan interes pa participa den e diferente oportunidadnan di formacion.

"Ora mi a ricibi e peticion pa crea un website pa Fundacion Educar pa Transformar, mi tabata contento pa por contribui na e desaroyo digital di e Fundacion. Den un periodo cortico nos a logra traha y prepara e pagina pa su lansamento oficial. E website ta un tool importante pa nos por comparti nos trabou, nos cursonan y e impacto cu nos ta crea den comunidad" segun Kimberly de Cuba, miembro di directiva di Fundacion Educar pa Transformar.

Pa e Fundacion, e website ta representa mas cu solamente un espacio digital. E ta un plataforma unda studiantenan, futuro participante, boluntario, aliado y miembro di comunidad por haya informacion y conoce mas tocante e oportunidadnan cu Fundacion Educar pa Transformar ta ofrece.

Fundacion Educar pa Transformar ta expresa su agradecimento na tur persona cu ta contribui na su crecimiento y ta invita e comunidad pa bishita e website y conoce mas tocante su mision di educa, crea oportunidad y transforma bida.