Iniciativa di Wind Creek Aruba 'Rumbo pa Mañan' ta inspirando hubentud pa construi un mihor futuro

ORANJESTAD (AAN): Wind Creek Aruba, pa medio di su equipo di ‘Corporate Social Responsibility’ (CSR),

ta sumamente orguyoso di por a aporta na comunidad cu un seminario gratis pa hubentud, esta “Rumbo pa Mañan “dedica pa inspira, orienta y empodera studiantenan di scol secundario mientras nan ta explora diferente posibilidadnan pa nan futuro. E iniciativa aki a reuni hobenan pa un experiencia interesante y significativo, diseña pa stimula nan pa descubri mas ainda nan potencial y yuda tuma pasonan cu confiansa rumbo na nan futuro.

E seminario aki a tuma luga riba diahuebs 27 di augustus 2026, na Renaissance Convention Center, caminda mas di 300 estudiante di scolnan secundario di Aruba a participa. “Cu Rumbo pa Mañan, nos tabata kier a crea un oportunidad pa e hubentud di Aruba tende conseho honesto y practico tocante algun di e decisionnan importante cu ta spera nan dilanti. Como compania, nos ta kere cu inverti den nos hobennan ta nifica inverti den futuro di Aruba,” asina Queta Werleman, presidente di e Comite di CSR di Wind Creek Aruba, a declara.

E iniciativa aki a wordo crea pa reconoce cu tin hopi pregunta y reto cu hobennan ta enfrenta ora nan ta planeando nan futuro. Sea cu nan ta considerando pa studia pafo di Aruba, sigui un caminda den emprendemento, of pone atencion riba nan salud mental y desaroyo personal, “Rumbo pa Mañan” a brinda studiantenan cu informacion practico, inspiracion y perspectivanan significativo.

E programa a tuma luga di 8'or di mainta te 12'or di merdia y a wordo presenta door di 3 orador inspirador cual tawata;  Psicologo Johnny Boekhoudt cu a elabora tocante salud mental y bienestar personal; Rebecca Naddall di Ban Studia a comparti orientacion tocante estudio afor di Aruba; y entrepreneur Omar-Steve Lejuez a comparti un perspectiva honesto tocante e oportunidadnan y retonan.

E seminario a wordo dirigi door di Tarick Ras, kende a fungi como MC y a yuda crea un ambiente dinamico, energetico y interesante durante henter mainta.

Pa haci e experiencia ainda mas agradabel, e studiantenan a ricibi un tas cu regalito, un desayuno, refresco y ice cream durante e evento. A clausura e mainta cu un rifa di sorpresa  y cada estudiante a ricibi un lunch box pa hiba cas.

Pa esnan cu no por a atende personalmente, TeleAruba a transmiti e seminario aki live, cual a permiti mas hoben y miembronan di comunidad pa beneficia di e conversacionnan y mensahenan comparti durante e evento.

Wind Creek Aruba ta expresa su sincero aprecio na tur cu  a yuda haci “Rumbo pa Mañan” un realidad. Un danki special ta bay na Elite Productions & Entertainment pa e montahe profesional di e seminario, TeleAruba pa e transmision en bibo door streaming, y De Palm Tours pa yuda cu e transporte di e studiantenan pa y for di Renaissance Convention Center.

Pa medio di iniciativanan manera Rumbo pa Mañan, Wind Creek Aruba ta sigui fortalece su compromiso cu e hubentud di Aruba, creando oportunidadnan pa educacion, desaroyo personal y empoderamento, mientras ta inverti den e siguiente generacion di nos dushi isla.