Tienda di Ley cu VeneAruba
ORANJESTAD (AAN): E luna aki lo bay tin dos mainta publico di sesion di informacion na Aruba, cu ta wordo presenta door di Tienda di Ley hunto cu VeneAruba. E sesionnan aki ta encuanto e iniciativa di ‘Hunto pa Progreso’, cu a suavisa e otorgamento di permiso di trabao, y cu a caba di anuncia cu a drenta e ultimo dos luna di esaki.
E ta bon pa esnan cu kier sa kico nan opcion ta, si bo ta eligibel, unda bo por aplica, y kico pa haci si acaso bo aplicacion wordo rechaza.
E sesionnan ta gratis, y no mester paga nada pa participa. Lo tin dos fecha pa esaki.
Prome ta Diasabra 8 di November 2025 for di 10:00 am te cu 12:00 pm na edificio di MFA Santa Cruz. E idioma pa esaki lo bay ta Spaño.
E di dos ta Diasabra 15 di November 2025 for di 9:00 am pa 11:00 am na Centro di Bario Lago Heights. E idioma pa esaki lo bay ta Ingles.
Loke ta ‘Tienda di Ley’: E Tienda di Ley ta un institucion cu ta yuda personanan cu tin pregunta of problema legal pero cu no tin recurso suficiente pa paga un experto legal. E ayudo ta consisti di conseho skirbi of asistencia cu formulario legal.
Tienda di Ley por duna conseho riba varios topiconan legal, incluyendo labor, huur, daño, contractnan, areglonan di pago, divorcio, imigracion y mas.
Si e pregunta of problema ta demasiado complica pa Tienda di Ley, e persona lo haya un indicacion pa cuadra cu un otro instancia cu por yuda. Importante di nota cu e Tienda di Ley ta duna conseho solamente y no ta representa persona den procedimentonan legal.
Durante e sesion, studiantenan di e Facultad di Ley di e Universidad di Aruba, cu ta traha como boluntario na Tienda di Ley, lo duna informacion den forma di un presentacion.
Despues di e presentacion, lo tin un sesion di Pregunta y Contesta, unda e publico por pone pregunta riba e topico trata. Ta importante pa menciona cu Tienda di Ley no por trata caso personal durante e Pregunta y Contesta pa por mantene privacidad y por haci investigacion necesario pa duna un conseho legal.
