Señor Jalken Antonia di Fundacion Ja Ik Aruba:
ORANJESTAD (AAN) Fundacion Ja Ik Aruba ta traha den colaboracion cu Departamento di Asuntonan Social (DAS) y Departamento di Progreso Laboral (DPL), cu e meta pa impulsa hobennan den nos comunidad haya trabou y mehora nan situacion di bida.
Segun Señor Jalken Antonia di Fundacion Ja Ik Aruba, despues di algun siman di participacion, mayoria di e hobennan cu a wordo referi door di DAS y DPL ta mustra un actitud mas positivo, yen di gana y entusiasmo pa drenta den e mercado laboral.
Fundacion Ja Ik Aruba ta un programa di ‘job matching’ basa riba liderazgo y bon comportacion, cu ta traha den cooperacion cu companianan local cu ta busca trahadornan motiva. E meta ta pa cria oportunidadnan pa cu e hobennan por haya un trabou den cua nan por identifica nan mes. Segun algun di e participantenan, e metodo di Ja Ik Aruba ta motiva nan no solamente pa drenta e mercado laboral, sino tambe pa mantene y desaroya nan trabao.
E fundacion ta brinda entrenamento y formacion pa cu e hobennan por comprende miho kico ta etica, moral y bon conducta laboral. E hobennan referi door di DAS y DPL mester sigui e programa, y despues di esey, pasa pa e fase di bishita companianan pa haya un oportunidad laboral.
Señor Antonia a enfatisa cu mayoria di e participantenan ta mamanan soltero, pero e programa ta habri pa tur persona entre 18 y 35 aña cu no tin trabou actualmente. E programa no tin ningun costo pa e hobennan - e unico rekisito ta pa tin gana pa mehora, traha, y cambia nan situacion.
