ORANJESTAD (AAN): Dialuna mainta tabata tin e prome conferencia di prensa oficial di gabinete Wever-Croes II.
Prome Minister Evelyn Wever-Croes a hiba palabra pa anuncia riba e topico di formacion y comienso di gobernacion como tambe riba su viahe recien na New York y e tema di sosten di likides.
E mandatario a splica pa loke ta e sosten di likides economico di October te cu December 2021 pa Aruba, manera ta conoci, Aruba ta entrega na Hulanda cuanto placa tin mester pa sosten di likides. Cft ta revisa e peticion y Cft ta duna un conseho na gobierno Hulandes y gobierno Hulandes ta aproba of no ta aproba a base di e conseho di Cft.
Desde cu Aruba a cuminsa haya sosten di likides aña pasa, cada biaha tabata tin un of otro cos cu mester a dialoga mas riba dje. Pero nunca Aruba a haya su mes den un situacion caminda cu Cft ta duna completamente conseho negativo pa Aruba por haya sosten di likides, e mandatario a remarca.
Pero esey a pasa e biaha aki. Cft a duna conseho negativo pa algun motibo cu Gobierno di Aruba no ta di acuerdo cu ne. Pero ta dialogando y papiando riba nan, Wever-Croes a expresa.
Riba esey, Hulanda kier a tuma e decision pa nenga Aruba e sosten di likides tambe riba argumentonan cu Aruba no ta di acuerdo cu nan, pero den e caso aki tambe ta dialogando riba esakinan, a agrega.
Segun Prome Minister, diabierna ultimo el a bay den combersacion cu Secretario di Estado Knops y tambe cu Premier Rutte na New York. E dialogo aki a yuda cu nan no a nenga Aruba e sosten di likides, pero ta duna mas tempo.
E mandatario a splica nan cu apenas ta un siman cu e gobierno nobo a sinta. Prome cu esey, desde 30 di Maart cu gobierno a cay te cu siman pasa diadomingo, tabata tin un gobierno demisionario cu no por tuma tur decision manera un gobierno completamente legitimo manera e ta awor.
Awor e gobierno nobo tin e legitimidad pa tuma decisionnan y a pidi Hulanda pa duna espacio pa por presenta e solucionnan cu mester pa por bin na remarke pa e sosten di likides, Wever-Croes a indica.
