Frans Ponson, presidente di CUA:
- Costo di bida a subi y lo sigui subi
ORANJESTAD (AAN)- Frans Ponson, Presidente di Comerciantenan Uni Aruba (CUA), den entrevista cu DIARIO, a expresa cu na Aruba mester haci un estudio tocante costo di bida, pero mester sa ki estudio wordo haci.
Den e mundo di cuminda, por ehemplo, e ta un sector unda prijs ta fluctua masha hopi mes (subi y baha). Como ehemplo el a menciona loke a sosode algun tempo atras cu prijs di webo cu e caha a yega te 30 Florin, y aworaki hasta tin cu ta costa menos di 3 Florin, y ningun hende ta grita aworaki.
Ponson ta kere cu sigur Banco Central y CBS a haci estudio y costo di bida a subi, pero cu e guera cu tin eyfo ta claro cu lo tin inflacion. “Pasobra esey no ta den man di Aruba ni di gobierno tampoco. E inflacion aki ta bay bin, por ta awo, y p’esey mester tuma e cosnan aki responsabel. Pero, atrobe, ora bo tuma un cos responsabel bo tin cu wak esnan den necesidad y no habri un cos pa loco. Mescos cu mi ta bisa den coriente, no subsidia tur hende innecesariamente, mi ta sigur cu tin miyonarionan cu tin cas di tres piso, pakico nos tin cu subsidia nan? Mescos den cuminda, kizas nos tin cu subsidia bon, pero esnan cu mester, y no tuma decisionnan y bay cuminza subsidia hende pa loco. Estudionan ey, mi no ta kere a wordo haci, estudionan di inflacion por ta si, pero falta hopi estudio pa yuda esnan den necesidad”, segun presidente di CUA.
El a elabora tambe riba e tema di salario minimo. “Nan ta bisa cu e no a subi e aña aki; salario minimo a subi cu 275 Florin, pasobra nan ta mare na 40 ora pa siman, pero esnan cu ta traha 40 pa 45 ora e salario minimo a subi cu 275 Florin si ta 45 ora maximo. Nan kier bay mand’e pa bestaansminimum papiando di 40 ora, pero 44 of 56 ora ta casi bay yega tres mil Florin”, Frans Ponson a remarca.
El a cuestiona cu ningun hende ta discuti e topico di “ban sinta na mesa papia di salario minimo of bestaansminimum. “Pero nos tin cu haci e cosnan aki corecto. Nos mester ta hopi cauteloso di no hinca Aruba den algo asina peligroso pa algo cu no por baha bek. Nos tin cu separa nos mes di tur e region aki cu prijsnan y si wak cuanto cos nos kier paga, buta e turista paga, mi no ta bisa cu ta contra pero mester wordo haci si, na un manera responsabel. Y prijs a subi y lo bay subi mas!” Frans Ponson a reitera cu enfasis.
