Inflacion den Augustus a subi cu 0,5% compara cu Juli

Indice di Prijs di Consumo anual a subi cu 2,7%

ORANJESTAD (AAN): Siman a habri, y Oficina Central di Estadistica (CBS) a emiti nan rapport di e Indice di Prijs di Consumo (CPI) pa luna di Augustus 2026.

   E CPI pa luna di augustus 2026 (112.12) a registra un subida di 0.5% compara cu e indice di luna di juli 2026 (111.53). E cambio di e CPI pa e ultimo diesdos (12) lunanan (augustus 2025 te cu augustus 2026) ta 2.7%, un subida di 3.5 punto di porcentahe (ppt) compara cu e periodo corespondiente di aña pasa (-0.8%).

   E promedio anual (ultimo 24 luna) di e tasa di inflacion pa e periodonan di augustus 2024 te cu augustus 2025 y augustus 2025 te cu augustus 2026 ta 1.0%, un subida di 0.6 ppt compara cu e 0.4% registra den e periodonan di (augustus 2023 te cu augustus 2024 y augustus 2024 te cu augustus 2025).

   Durante luna di augustus 2026, ocho di e 12 sectornan a registra subidanan di prijs. E sectornan cu tabatin e mayor impacto riba e CPI tabata “Transporte” (3.4%), “Restante bienes y servicio” (1.0%) y “Vivienda” (0.3%), contribuyendo respectivamente cu 0.46, 0.12 y 0.07 ppt.

   E subidanan den e sectornan restante a contribui hunto cu 0.14 ppt na e CPI di augustus 2026. E subidanan aki a wordo parcialmente contraresta, principalmente door di un caida di 1.8% den e indice di e “Comunicacion”, cu a contribui cu -0.16 ppt na e CPI. E caidanan den e sectornan restante a contribui hunto cu -0.10 ppt na e CPI di augustus 2026.

   E subida den e sector di “Transporte” a wordo causa principalmente door di un subida den e categoria “Gasto relaciona cu uso di vehiculo di transporte personal” (5.7%), causando un efecto di 0.49 ppt. E subida den e sector di “Restante bienes y servicio” a wordo causa principalmente door di un subida di 8.3% den e categoria “Otro articulonan personal”, causando un efecto di 0.11 ppt. E subida den e sector di “Vivienda” a wordo causa principalmente door di un subida di 1.0% den e categoria “Mantencion y reparacion di vivienda”, causando un efecto di 0.06 ppt.

   E caida den e sector di “Comunicacion” a wordo causa door di un caida di 17.7% den e categoria “Ekipo di telefon y fax”, causando un efecto di -0.16 ppt.

   Canasta di consumo: E canasta di consumo di e CPI ta consisti di 408 bienes y servicionan. Compara cu juli 2026, 50.0% di e bienes y servicionan aki a registra un aumento di prijs, causando un efecto di 1.50 ppt, mientras cu 32.1% a registra un caida di prijs, contribuyendo cu un efecto di -0.98 ppt.

   Pa e restante 17.9%, no tabatin cambio di prijs. Compara cu juli 2026, prijsnan di bienes a registra un subida di 1.6%, causando un efecto di 0.92 ppt, mientras cu prijsnan di servicionan a registra un caida di 0.9%, contribuyendo cu un efecto di -0.40 ppt riba e CPI di augustus 2026.

   Core inflation: E asina yama CPIC (core inflation), cu ta exclui e efecto di energia y cuminda, ta wordo calcula door di compara e indice promedio di e periodo di e 12 lunanan mas reciente cu e promedio di e periodo di 12 lunanan anterior (Promedio anual). E CPIC a registra un aumento di 1.0% na augustus 2026. Pa e mesun periodo, e indice di energia, componi di electricidad, awa, gasolin y diesel, a registra un subida di 0.5%, mientras cu e indice di cuminda a aumenta cu 2.0%.