Frans Ponson di CUA:
*Falta di control den diferente sector
ORANJESTAD (AAN): Comerciantenan Uni Aruba (CUA) ta propone pa stablece un taskforce permanente encarga cu identificacion, control y pa atende actividadnan comercial ilegal den diferente sector di economia.
Segun presidente di CUA, Frans Ponson, actividad informal no ta limita na un solo tipo di negoshi. E fenomeno ta wordo observa, entre otro, den transporte, servicio di delivery, hospedahe (Airbnb), actividad comercial for di cas, taxi pirata y otro tipo di servicio cu ta wordo anuncia habiertamente, especialmente via social media.
Ponson ta cuestiona pakico responsabilidad pa señala e actividadnan aki mester cay constantemente riba comerciante individual, mientras cu hopi di nan ta wordo anuncia publicamente y por wordo identifica mediante control regular di parti di autoridadnan competente.
Segun e presidente di CUA, e actividadnan ilegal aki no ta keda scondi. “Tur hende sa cu esaki ta pasando, pasobra e mesun personanan cu ta opera ilegalmente ta anuncia nan servicio publicamente.”
Ponson a remarca cu tampoco e, ni ningun otro ciudadano, mester constantemente pone Gobierno na haltura di situacionnan cu ya ta visibel y visibel den comunidad. Segun e, autoridadnan mes tin posibilidad pa identifica y sigui e actividadnan aki mediante supervision y control consistente.
Otro punto di preocupacion pa CUA ta e temor cu ta existi entre comerciantenan pa haci denuncia. Ponson a indica cu hopi comerciante tin miedo pa wordo identifica publicamente, specialmente ora no tin garantia cu despues di un denuncia autoridadnan lo tuma accion concreto.
E consecuencia, segun CUA, ta cu hopi actividad comercial ilegal por sigui opera, mientras cu comerciante registra mester cumpli cu tur obligacion legal, incluyendo permiso, impuesto, salario y otro gastonan obligatorio relaciona cu operacion di un negoshi formal.
CUA ta considera cu Aruba, como un isla chikito, tin tur posibilidad pa stablece un sistema di control efectivo, si e diferente departamentonan concerni comparti informacion y traha den forma coordina.
“Den 20 kilometer cu Aruba tin di punta pa punto, nos no por handle e situacion aki? No ta cos cu nos tin un ciudad di miyones di hende. Esaki ta un berguensa,” Ponson a enfatisa.
Pa atende e problema, e gremio ta propone creacion di un taskforce permanente cu ta efectua control regular, y no solamente accionnan temporal of campaña electoral. E grupo aki por investiga actividad comercial cu ta anuncia publicamente, incluyendo via social media, y verifica si e personanan of negoshinan concerni ta opera conforme ley.
Segun CUA, un maneho asina por contribui na un tereno comercial mas igual, unda tur ciudadano cu ta opera un negoshi ta wordo trata bou di e mesun reglanan y obligacionnan. Alabes, esaki lo reduci chens cu negoshinan ilegal ta sigui crece.
“E problema tin solucion. Loke falta ta boluntad, coordinacion y aplicacion constante di e ley,” Ponson a expresa.
