Lineanan crusero confrontando aumento di casonan
ORANJESTAD (AAN): E industria di turismo crusero ta wordo poni na prueba ora cu un pasahero cu a test positivo pa Covid-19 a fayece.
E pasahero y 26 miembronan di e crew abordo di Carnival Vista a test pa Covid-19, pero a resulta cu e pasahero a muri despues.
E compania a bisa cu danki na e protocolnan a logra detene un contagio mayor.
A medida cu e variante Delta altamente contagioso ta surgi den henter mundo, ta wordo poni na prueba e protocolnan di salud y seguridad estableci pa e barconan crusero.
Durante dos siman, na final di juli y inicio di augustus, a identifica 27 contagio pa coronavirus abordo di e crusero Carnival Vista cu a sali for di Galveston, Texas.
Un di e personanan infecta ta esun cu a fayece.
Ta trata di e mayor number di casonan reporta abordo di un barco desde juni, ora cu a reinicia e cruseronan den Caribe y Merca, y e prome morto.
E pasaheronan y e miembronan di e tripulacion a wordo isola despues di e test positivo pa Covid. 'E contact tracing' tambe a wordo realisa y no tabata tin mas casonan raporta te cu 11 di Augustus ora cu e barco a yega na e waf di Belize (Centroamerica), segun Carnival.
Aunke e barco a sali di Texas, unda ta prohibi e empresanan exigi vacunanan, mas di 96 porciento di e pasaheronan a wordo vacuna y tur, menos un miembro di e tripulacion, tabata completamente vacuna, segun e hunta di turismo di Belize.
Mayoria di e miembronan di e tripulacion contagia tabata asintomatico of a experimenta sintomanan leve di e virus, pero Marilyn Tackett, un pasahero di 77 aña di Oklahoma, a wordo interna na e hospital di Belize y a wordo intuba despues di a presenta complicacionnan respiratorio.
Algun dia despues, el a wordo traslada pa un hospital na Tulsa unda a ricibi tratamento, pero riba 14 di augustus su condicion a empeora y a muri.
E linea crusero a bisa cu tabata poco probabel cu Tackett lo por a haya coronavirus abordo di e barco, cu a sali for di Galveston riba 31 di juli, y cu el a haya atencion medico experto abordo prome cu su traslado na e hospital.
E linea crusero no a examina e pasaheronan vacuna prome cu aborda e barco.
Siman pasa, e Centronan pa e Control y Prevencion di Enfermedadnan (CDC) a emiti un aviso nobo, unda ta adverti e personas cu mayor riesgo di enfermedad grave pa Covid-19 pa evita viaha den crusero, independientemente di nan estado di vacunacion.
Carnival no ta e unico linea crusero cu a experimenta un aumento di casonan. Na cuminsamento di e luna aki, seis pasahero di Royal Caribbean a test positivo abordo di e barco Adventure of the Seas.
E empresanan a atende cu e aumento reciente di casonan mediante e introduccion di rekisitonan di prueba previo na e salida pa tur e pasaheronan. Carnival tambe a agrega e uso obligatorio di tapaboca dia 7 di augustus pa tur e huespednan vacuna y no vacuna den areanan interior y a prohibi humamento den casino.
Michael Bayley, director ehecutivo di Royal Caribbean, a bisa cu e linea crusero tabata tin un of dos caso positivo den mas di 1,000 huesped pa siman pa barco. Mas di 90 porciento di e pasaheronan ta vacuna, a indica, y debi na e rekisitonan di e pruebanan previo na e embarke, ta evita cu entre dos y dies pasahero ta aborda e barconan cada siman pa motibo cu nan ta test positivo den e pruebanan.
