ORANJESTAD (AAN) – E reunionnan di Minister Presidente Evelyn Wever-Croes, den su calidad di Formador di e Gobierno nobo, ta sigui e siman aki.
Despues di a reuni cu Fundacion Movimento ta Bida, señora Rosa Leon a comenta, den conferencia di prensa, tocante e resultado di dicho reunion.
Rosa Leon a expresa cu pa Fundacion Movimento ta Bida, tabata hopi importante, mirando cu e grupo meta ta birando hopi grandi na Aruba, unda cu mester tin hopi atencion, vooral pa nan sinti cu nan ta parti di nos comunidad ainda y cu e fundacion por haci uso di nan conocemento.
“Nos a papia cu Formador riba 12 punto di atencion, cu pa nos ta hopi importante, mirando cu e meta di nos Fundacion ta pa trece proyectonan innovativo pa nos 60 plussers. Esaki nos ta logrando, pero nos no por logra nos so, y pesey nos ta pidi ayudo di otro instancianan pa nan tambe uni cu nos, y hopi importante cu e gobierno den formacion sa na kico nan mester tene cuenta cune ora ta trata di adulto mayor”, Rosa Leon a señala.
Un di e 12 puntonan importante cu e fundacion ta e casnan di cuido, den sentido di con nan ta wordo controla, con nan ta brinda e calidad di cuido pa e adultonan mayor, mirando cu esey ta nan ultimo hogar, y pa nan ta hopi importante sinti nan mes na cas. Nan ta sali di nan ambiente di cas, unda nan ta sinti agradable y pa e fundacion ta importante pa tin e conocimento con ta nan calidad di bida ora e grandinan ta wordo traspasa di nan cas pa un cas di cuido.
Rosa Leon a agrega cu e concientizacion pa e boluntario ta hopi importante, pasobra ora un persona yega su edad di pension e no sa kico mas pa haci, sea bo ta bay cas traha, siendo cu eynan e ta perdiendo hopi conocemento cu nan por traspasa esaki na profesionalnan hoben.
Otro aspecto ta cifranan, Rosa Leon a indica. E fundacion no sa si tin cifra, cuanto nan ta, na unda nan ta, con nan estado fisico y mental of social ta. Esaki ta haci dificil ora e fundacion kier crea un proyecto pa nan, pasobra e trabao ta bira doble pasobra nan mes tin cu haci investigacion, siendo cu si nan tin e datonan aki caba, lo por traha mas direct cu e necesidad cu tin eyfo.
Rosa Leon a duna di conoce cu Fundacion Movimento ta Bida ta wordo subsidia cu fondonan cu ta bin di Hulanda, y esey tambe ta un punto cu a bin dilanti cu Formador, pasobra e proyecto ta wordo subsidia pa tres aña y despues di esaki nan mester por bira “self-standing”.
E ta jammer pasobra nan tin hopi actividad pa 60 plussers pero realidad ta cu nan pension no ta yega pa hopi. E fundacion kier tene nan activo, pero no kier kita parti di nan pension. Rosa Leon a subraya cu tin diferente opcion cu por haci uso di dje, pero sigur e aspecto financiero nan a trece dilanti Formador, y a entrega nan un presupuesto tocante con nan por haci uso di locual nan ta pidi financieramente.
