ORANJESTAD (AAN): Studiantenan di Universidad di Aruba (UA) cu ta parti di e programa di ingenieria ‘Sustainable Island Solutions through STEM’ (SISSTEM)
a ehecuta un consulta di sostenibilidad cu lo sostene Aruba Airport Authority N.V. (AAA) pa progresa den e area aki ariba corto y largo plazo.
E resultado di e consulta a wordo entrega na CEO di AAA, esta Joost Meijs door di Alba de Agustin y Eric Mijts di UA, den presencia di varios representante di e team di maneho y e team di sostenibilidad na AAA.
A base di un enfoke structura cu ta inclui midimento tecnico, estudio di literatura, analysis di varios documento y entrevistanan, studiantenan di UA a logra formula recomendacionnan pa reduci e cantidad di CO2 cu ta den liña cu e agenda di sostenibilidad di AAA. Aeropuerto lo implementa varios di e recomendacionnan aki y alabes lo sigui involucra studiantenan di UA den e proceso.
E colaboracion entre UA y nos industria ta duna nos studiantenan oportunidad pa aplica loke nan a siña den nan estudio ariba desaroyo sostenibel di Aruba.
Den e foto por mira di robez pa drechi: Shensley Tromp, director di desaroyo y tecnologia; Marcus Steenken, manager di mantencion; Joost Meijs, CEO; Alba de Agustin, docente y candidato PhD, Eric Mijts, coordinador senior di SISSTEM; Angeline Flemming, director di salud, seguridad y sostenibilidad; Raymond Croes, ingeniero di operacion y mantencion; Armand Kelly, Safety & Sustainability Officer.
