Relato oficial relaciona cu Februari
ORANJESTAD (AAN): Analisis di Oficina Central di Estadistica ta mustra cu den e ultimo 12 lunanan, diez di e 12 sectornan a registra subida di prijs. E subidanan cu tabata tin e mayor efecto riba e CPI a worde registra pa e sectornan di “Vivienda” (12.6%), “Transporte” (11.5%), “Cuminda y bebida no-alcoholico” (11.8%) y “Mobilario” (10.0%), causando un efecto di respectivamente, 3.11, 1.55, 1.30 y 0.90 ppt. E subidanan den e restante sectornan a contribui cu un efecto di 0.95 ppt riba e CPI di Februari 2022 - Februari 2023.
E subidanan aki a worde contraresta parcialmente door di caida den e indicenan di e sectornan di “Comunicacion” (-7.1%) y “Paña y zapato” (-2.1%), cu a contribui cu un efecto di respectivamente, -0.59 y -0.05 ppt.
E subida den e sector di “Vivienda” a worde causa principalmente door di subidanan di respectivamente, 23.0% y 17.9% den e categorianan “Electricidad, gas y otro combustible” y “Suministro di awa y otro servicionan relaciona cu vivienda”, causando un efecto di respectivamente, 1.74 y 0.85 ppt.
E subida den e sector di “Transporte” a worde causa door di subidanan den e categorianan “Compra di vehiculo” (20.1%) y “Gasto relaciona cu uso di vehiculo di transporte personal” (7.7%), causando un efecto di respectivamente, 0.89 y 0.66 ppt.
E subida den e sector di “Cuminda y bebida no-alcoholico” a worde causa principalmente door di un subida di 11.8% den e categoria “Cuminda”, causando un efecto di 1.16 ppt. E subida den e sector di “Mobilario” a worde causa principalmente door di subida den e categorianan “Aparato pa uso domestico” (14.9%), “Mueble y accesorionan, tapijt y otro tipo di material pa vloer” (26.8%) y “Bienes y servicio pa mantencion ordinario di cas” (5.7%), causando un efecto di respectivamente, 0.38, 0.25 y 0.24 ppt.
E caida den e sector di “Comunicacion” a worde causa door di un caida di 5.5% den e categoria “Servicio di telefon y fax”, causando un efecto di -0.44 ppt. E caida den e sector di “Paña y zapato” a worde causa door di un caida den e categoria “Paña” (-4.4%), causando un efecto di -0.09 ppt.
Canasta di consumo: Den e ultimo aña cu a pasa 74.8% di productonan den e canasta di consumo di e CPI a conoce un aumento di prijs causando un
efecto di 8.69 ppt, mientras cu 18.1% ta mustra un caida di prijs, cu a contribui cu un efecto di -1.57 ppt y pa e restante 7.1% no tabata tin cambio den prijs.
Prijsnan di bienes a subi cu 11.3% y a causa un efecto di 6.48 ppt. Prijsnan di servicionan a conoce un subida di 1.5% y a causa un efecto di 0.65 ppt.
Bestaansminimum: Den e ultimo diesdos lunanan e bestaansminimum pa un hogar consistiendo di dos adulto y 2 mucha (edad 0-15 aña) e registra un subida di Afl. 462, di Afl. 4,931 na Februari 2022 pa Afl. 5,393 na Februari 2023. E subida aki a worde causa principalmente door di subidanan den e sectornan “Cuminda y bebida no-alcoholico” (Afl. 236) y “Vivienda” (Afl. 183).
Cambio di prijs di petroleo, utilidad, gasolin y diesel: E prijs promedio pa bari di petroleo a conoce un caida di US$ 14.33 (-15.7%) di US$ 91.32 na Februari 2022 pa US$ 76.99 na Februari 2023.
E indice di Energia a subi cu 17.9% den e ultimo aña y a causa un efecto di 2.92 ppt. E indicenan di “Gasolin” (6.8%) y “Diesel” (21.6%) a registra subidanan, causando un efecto di respectivamente, 0.34 y 0.08 ppt. E indicenan di “Electricidad” (22.7%) y “Awa” (23.1%) a registra subidanan, causando un efecto di respectivamente, 1.65 y 0.85 ppt. E restante 404 bienes y servicio hunto, a conoce un subida di 5.0% y tabata tin hunto un efecto di 4.20 ppt.
Cambio di prijs di Cuminda y servicio di catering: Den e ultimo 12 lunanan e indice di “Cuminda & servicio di catering” a subi cu 10.5%. E indice di “Cuminda na cas” a conoce un subida di 11.8%, unda tur e diesun (11) indicenan di e gruponan di “Cuminda na cas” a subi durante e periodo aki.
E indice di “Lechi, keshi y webo” a conoce un subida di 17.6%, e subida mas grandi entre e gruponan di “Cuminda na cas”. Ademas otro subidanan significante a worde registra den e indicenan di “Pan y otro productonan di grano” (14.9%), “Batata, yuca y batata dushi” (12.8%), “Carni” (11.7%), “Berdura” (11.4%), “Bebida no-alcoholico” (11.2%), “Sucu, jam y otro tipo di cos dushi” (10.5%), “Azeta y otro productonan traha di vet” (10.4%) y “Restante productonan pa alimentacion” (9.5%).
E indice di “Cuminda pafo di cas” a registra un subida di 7.4% den e ultimo 12 lunanan.
