Indice di cuminda a registra un subida di 2.7%

Oficina Central di Estadistica

ORANJESTAD (AAN): Oficina Central di Estadistica ta presenta e resultadonan principal di e Indice di Prijs di Consumo (CPI) pa luna di Juni 2024.  

Canasta di consumo

E canasta di consumo di e CPI ta consisti di 408 bienes y servicionan. Compara cu Mei 2024, 37.0% di e bienes y servicionan aki a conoce un aumento di prijs causando un efecto di 0.46 ppt, mientras cu 45.6% ta mustra un caida di prijs, cu a contribui cu un efecto di -1.09 ppt y pa e restante 17.4% no tawata tin cambio den prijs. Prijsnan di bienes a baha cu 1.1% y a causa un efecto di -0.63 ppt. Prijsnan di servicionan a conoce un subida leve di 0.01% y a causa un efecto insignificante riba e CPI di Juni 2024.

Den e ultimo aña cu a pasa 55.4% di productonan den e canasta di consumo di e CPI a conoce un aumento di prijs causando un efecto di 4.46 ppt, mientras cu 37.5% ta mustra un caida di prijs, cu a contribui cu un efecto di -2.08 ppt y pa e restante 7.1% no tawata tin cambio den prijs.

Core inflation

E CPIC (core inflation) - CPI excluyendo e efecto di energia y cuminda - a registra na Juni 2024 un subida di 2.8%. E indice di energia - cu ta consisti di e productonan: electricidad, awa, gasolin y diesel - a registra un caida di 2.8%. E indice di cuminda a registra un subida di 2.7%.

Kico ta CPIC?

E CPIC (core inflation) of e inflacion basico ta un porcion di e inflacion unda cierto articulonan cu tin movimentonan di prijsnan volatil ta wordo exclui, manera productonan alimenticio y energetico. Na momento cu e inflacion basico wordo calcula, e componentenan mas volatil ta wordo elimina di e inflacion total. E indice di e inflacion basico ta sirbi pa evalua e tendencia riba medio y largo plazo di e nivel general di prijsnan. Pa ahusta maneho monetario, hopi economista ta enfoca riba e tasa di e inflacion basico, como cu esaki ta permiti un evaluacion mas profundo di e procesonan di inflacion reciente den e economia.

E CPIC ta wordo calcula door di compara e indice promedio di e periodo di e 12 lunanan mas reciente cu e promedio di e periodo di 12 lunanan anterior (Promedio anual).

Elaboracion di un CPI tin tres meta principal.

1. Como un metodo di calculo pa compensa empleadonan pa motibo di perdida di poder di compra, ahustando nan salarionan, cu e proporcion di e cambio porcentual di CPI, locual ta conoci como indexering.
2. Como un mecanismo pa ahusta componentenan di e producto domestico bruto (GDP) di termino nominal pa termino real den Cuentanan Nacional. (Por ehempel door di elimina e efectonan di cambionan di prijs di e balor di consumo)
3. Como un medio pa gobiernonan y/of banconan central fiha obhetivonan inflacionario.