Asja Dongen a splica:
ORANJESTAD (AAN) – Asja Dongen, Relacionista Publico di Web Aruba NV, den entrevista cu DIARIO, a duna di conoce cu e planta mobil cu e compania a caba di adkiri, ta un di e medidanan riba termino cortico pa garantiza fluho di electricidad pa Aruba, pero na termino medio ta bay instala baterianan, riba tereno di WEB, unda cu nan por warda energia renobabel.
Energia renobabel kiermen di biento y di solo, cu na e momento ey no tin pedido p’e. “Asina, ora nos ward’e den e baterianan na momento cu tin necesidad nos por uza esey y tambe nos ta bezig pa haci un expansion di e planta di recipe fase tres. Nos ta bay expande esey cu dos extra motor, dus esey lo yuda pa atende cu e demanda creciente na termino largo.
Riba termino largo tambe nos mester bay materializa e expansion di energia renovable. Esey kiermen, amplia e mulinanan di biento y e parkenan solar, pero esey ta riba un termino mas largo”, Dongen a splica.
E dama a subraya cu na final WEB mester tin e balansa entre energia renovable y energia di motornan. “Manera boso a custumbra di nos, nos ta keda update cu informacion, esey via nos propio medionan social, pero tambe via prensa. Asina cu nos tin desaroyonan nobo, nos lo pone pueblo na haltura”, Asja Dongen, Relacionista Publico di WEB Aruba NV a bisa, den entrevista cu DIARIO.
{gallery}WEB Aruba NV cu medidanan na corto, medio y largo plazo pa sigura fluho di energia na Aruba{/gallery}
