Inauguracion oficial di e proyecto 'La Casa del Venezolano'

Cu sosten di Pan American Development Foundation

ORANJESTAD (AAN):   Diaranson atardi tabata un dia special pa e Fundacion Venearuba Solidaria. Despues di varios luna di preparacion a inaugura oficialmente e localidad nobo ubica na Domicanessenstraat 24, Villa Guillermina, cual ta sede di e proyecto 'La Casa del Venezolano'.

Na e ocasion special aki a asisti un grupo selecto di invitadonan, entre nan Minister Glenbert Croes y Minister Endy Croes di parti di Gobierno di Aruba como tambe miembronan di e directiva, boluntarionan, colaboradornan y tambe representantenan di  Pan American Development Foundation (PADF).

Luis Zarraga, Community Manager y Coordinadora di e Proyecto Grislynn Hernandez a corta e cinta den compania di e mandatarionan pa asina 'La Casa del Venezolano' por a keda inaugura oficialmente.

Tabata un rato hopi ameno unda a comparti y refleha riba e legado di e comunidad venezolano na Aruba.

Tabata un soño cu tres aña pasa a inicia y cu awor a bira un realidad, Zarraga a expresa.

Banda di esaki, Grislynn Hernandez a manifesta cu tabata un lucha grandi pa por a yega un espacio di proteccion pa esnan mas vulnerabel na Aruba. El a gradici tur esnan cu a yuda haci e proyecto aki posibel. 

Maria Jose Catalan, Coordinadora di PADF pa Aruba y Corsow a duna di conoce cu na loke nan ta dedica ta na fortalece e capacidadnan local pa asina yuda implementa e actividadnan pa e imigrantenan.

El a bisa cu danki na e Departamento di Migracion di Merca, PADF por a apoya e apertura di 'La Casa del Venezolano' y tur e actividadnan cu ta wordo realisa.

'La Casa del Venezolano' ta un organisacion cu ta enfoca den e educacion como instrumento pa e inclusion y e transformacion social. Pa logra esaki nan ta duna asistencia huridico y social na e imigrante, y tambe ta ofrece cursonan gratuito pa e siñamento di e idioma Papiamento, Hulandes y Ingles.

Ademas regularmente ta brinda tayernan di resiliencia, derechonan humano, proteccion internacional, gruponan di sosten, entre otro.