Francis Jacobs a produci video clip interesante cu e grandinan di Paviljoen

ORANJESTAD (AAN) – Francis Jacobs a produci un video clip, den cual e protagonistanan ta e grandinan di San Pedro Paviljoen y Sint Michael Paviljoen.

Francis a splica cu el a haya e peticion for di Judith Croes pa haci e video clip aki, den Dia di Labor. E meta interesante tabata pa cada un di e grandinan cu a participa bisti segun e trabao cu nan a desempeña, of e deporte cu nan a practica. Por ehemplo esun cu a eherce e profesion di polis, a bisti e dia ey como polis, of si tabata na Douane a bisti como duanero, etc. Y si tabata den deporte, tambe a bisti e uniform di e team di cual a forma parti di dje.

Francis Jacobs a sinti su mes hopi contento di por a produci e video clip aki cu nos grandinan, pa nan por tine como recuerdo y tambe nan famia.

Judith Croes tambe a splica tocante e iniciativa aki, cu cual a honra nos grandinan riba Dia di Obrero, pero tambe duna balor na tur trahador di Aruba y di mundo completo, riba nan dia. E idea tabata pa haci algo great pa e grandinan aki, despues di dos aña di pandemia cu danki Dios ta kedando atras.