Inauguracion di e prome clinica gratis pa atencion di imigrantenan sin acceso na cuido medico

ORANJESTAD (AAN):  Alena Samanez, Coordinadora di e proyecto di IOM Aruba (International Organization for Migration) a duna di conoce cu nan ta agencia di Migracion di Nacionnan Uni y awor nan a inaugura e prome clinica gratis di Aruba.

            Esaki ta un clinica specialmente pa personanan sin acceso na e servicionan di salud. Lo duna atencion na e casonan necesario, pero primordialmente e meta ta pa atende e personanan cu no tin acceso na cuido medico, a splica.

            Samanez a sigui bisa cu a atravez di e gran esfuerso aki por logra e SDG's 3.8 (Sustainable Development Goals) cu ta incrementa e acceso na cuido di salud di tur persona sin importa nan status migratorio, nacionalidad, etc.

            El a agrega e personanan por yega na e clinica por medio di varios canal. Un di nan ta acudi na Xavier University, na Santa Helenastraat, riba diamars y diahuebs, entre 4 pm y 8 pm. Otro canal ta tambe contacta e clinica directamente pa medio di IOM of un di nan partnernan cu ta ACNUR (Agencia di Refugiadonan di Nacionnan Uni), HIAS, Venearuba Solidaria of PADF.

            Esnan cu acudi pa haya servicio lo por haya un prome filter cu ta un chekeo medico basico (colesterol, sucu, presion). Dependiendo di e resultadonan, e beneficiario lo por wordo atendi pa Dr. Rivera, cu ta un internista cu tres specialidad.

            Den caso di mester remedi tambe tin un programa di vouchernan di remedi pa personanan vulnerabel cu no tin e capacidad financiero pa tin acceso na e remedinan cu nan tin mester di dje, a bisa.

            Tambe tin vouchernan pa laboratorio pa haci analisisnan mas profundo di cualkier malesa of malestar cu e beneficiario por tin. E posibilidad tambe ta existi pa atende cu pashentnan cronico riba un plazo cu loke ta e pago di e remedinan pa nan tratamento.

            Ya caba tin dos siman di e apertura, a bisa, y a atende mas di 200 persona, e coordinadora di IOM Aruba a duna di conoce.