Diasabra merdia por mira e Eclipse Parcial na Aruba tambe

Dr. Edward Cheung lo ta na EPB Hato pa actividad special

ORANJESTAD (AAN): Diasabra awor, dia 14 di October lo tin un asina yama “Eclipse Anular di Solo”, cu na Aruba sin embargo solamente lo ta visibel como un eclipse parcial di solo.

   Den e kaso aki casi 62% di solo lo ser cubri door di luna na e punto culminante di e Eclipse aki.

   E fase parcial di e eclipse aki na Aruba lo cuminsa merdia pa 12:43 pm.  E lo yega su punto maximo 2:27 pm, esta casi 2:30’or.

   E fenomeno aki lo caba 4:02 pm, esta un poco despues di 4’or di atardi.

Un suplica ta pa hamas bay mira e Eclipse aki direct cu bo wowo!  Lo bo keda ciego pa resto di bo bida.

   Algo notable pa menciona cu na EPB Hato, lo bay tin un actividad pa publico bay mira e Eclipse Parcial aki, usando material y otro metodonan pa mire.  E cientifico Arubiano trahando pa NASA, esta Dr. Edward Cheung tambe lo bay tey presente.

   E actividad aki na EPB Hato lo ta for di 12:00 pm te cu 4:30 pm.  Lo bay duna informacion total encuanto Eclipsenan Solar y Lunar.  Tambe lo bay tin un Planetarium cu ta wordo yena cu aire.  Lo bay tin un caminata chikito di e sistema solar.  Lo bay tin zona di colaboradornan educacional, y tambe demostracion cu telescoop di studiantenan.  Lo bay tin bendemento di cuminda y bebida tambe.

    Corda un biaha mas, DIARIO ta enfatisa pa comunidad no bay mira solo sin proteccion pa wowo.  Usa un bril di eclipse di solo (no usa uno cu bo tin warda di 1998 mas).

   Tambe hamas y nunca no mira den binocular of telescoop direct na solo (sin cu bo tin un filter special poni riba dje).  Corda cu si bo mira solo direct, e ta un peliger grandi cu e ta kima bo retina di bo wowo y bo ta keda ciego.

   Mihor bay check na EPB Hato con nan lo tin actividad pa asina mira e actividad aki.