Importante ta e extension Consulta Publico pa Derecho di Naturalesa

Ministro Ursell Arends:

• Pueblo por duna nan aporte na e propuesta di e Ley te cu dia 21 di april 2024 

ORANJESTAD (AAN): Bao liderazgo di Minister Ursell Arends, encarga cu proteccion di naturalesa, a inicia un serie di sesionnan di consulta publico encuanto e introduccion di Derecho di Naturalesa den nos constitucion. E esfuersonan aki ta refleha un paso grandi den e reconocemento y proteccion di e derecho fundamental di naturalesa pa existi y prospera.

   E sesionnan di consulta a tuma luga e ultimo dos siman cual a inclui participacion di e publico en general, gremionan comercial, abogado, y hues, conhuntamente cu Directie Natuur en Milieu. Durante e sesionnan a discuti cada articulo di e proposicion di ley detayadamente, colectando e punto di bista y sugerencianan di participantenan. A enfoca riba dialogo abierto y pa asina ricibi feedback constructivo. Minister Arends a pone enfasis ariba e importancia di inclui un variedad di gruponan di interes den e proceso di desaroyo di e ley, asegurando cu e legislacion final ta representativo di e deseo y necesidad di e comunidad di Aruba.

   E proceso di consulta ta continua riba plataforma digital. Esnan interesa por lesa e propuesto di ley y comparti nan opinion y sugerencianan pa medio di e formulario online disponibel riba:

www.publico.aw/consulta

E feedback di e comunidad lo yuda forma e base pa un ley mas fuerte y efectivo.

   Pa fomenta un nivel mas amplio di participacion y transparencia, e deadline pa entrega di feedback a ser extendi te cu dia 21 di april, dunando e comunidad mas oportunidad pa aporta na e desaroyo legislativo. E fecha di 21 di april ta un dia prome cu e celebracion di dia di mama tera, y ta marca un aña desde cu e iniciativa legislativa aki a ser entrega.

   “E iniciativa aki ta mas cu legislacion; e ta un declaracion di nos compromiso colectivo pa respeta, proteha, y trece naturalesa y desaroyo den balans pa nos Pais," segun Minister Ursell Arends.

   Ministerio di Naturalesa ta compromete pa continua trabao den un forma transparente y colaborativo, y ta agradecido pa e apoyo y contribucion di cada stakeholder y miembro di comunidad.