ORANJESTAD (AAN): Despues di basta tempo Fundacion Corector di Papiamento (FCP), antes Grupo Corector di Papiamento,
ta bolbe organisa un anochi literario dia 16 di april venidero. Lo dedica e anochi aki na e tres docentenan cu na aña 2001 pa 2002 a duna e curso di Corector di Papiamento, bou auspicio di Ministerio di Enseñansa y a traves di Departamento di Enseñansa. Nan ta Sr. Ramon Todd Dandaré, Sr. Mario Dijkhoff d.f.m. y Sr. Pedro Velasquez d.f.m.
Como un gradicimento y pa recorda nan lo duna un homenahe special na e personanan aki cu a haci asina hopi pa educa otronan riba e bon uzo di nos idioma Papiamento. Entre otro e grupo di Corector mes cu desde 2003 a organisa diferente actividad relaciona cu e bon uzo di nos idioma.
Durante e anochi literario aki lo tin declamacion di poesia di Sr. Sergio Velasquez, yiu di Pedro, un charla di Sr. Gregor Dijkhoff di Stichting Dijkhoff Papiamento Cursussen tocante trabou di su tata Mario, linguista y autor. Tambe lo tin un presentacion di Sr. Ramon Todd Dandaré, cu lo papia di e trabou cu nan a haci y lo declama poesia. Sra. Linda Richardson tambe lo haci presentacion di su buki di terminologia den casonan penal den 3 idioma y conta un tiki mas di su motivacion y su plannan pa futuro. Lo tin benta tambe di diferente buki di Mario. Entre otro e diccionario/woordenboek Nederlands-Papiaments / Papiaments-Nederlands, Proverbio y Dicho di Aruba, Expresion, Gramatica di Papiamento, Terminologia Gramatical, Sinonimo y Reduplicacion, Papiamento un pa un.
A reedita casi tur buki di Mario. Gregor ta invita tur docente cu ta duna les di Papiamento na stranhero, paso lo duna informacion tocante e metodo ‘Papiamento un pa un’ y lo splica di con e metodo ta asina exitoso. Nos tin e metodo aki pa hende habla Hulandes, Ingles y Spaño.
FCP ta invita famia, conoci, ex-alumno y tur interesado pa un anochi literario interesante di dedicacion y recuerdo pa duna un homenahe special na tres persona cu a contribui asina hopi den enseñansa pa progreso di nos idioma Papiamento.
E invitacion pa e anochi literario aki di dedicacion y recuerdo lo ta pa diamars 16 di april 2024 na Biblioteca Nacional, cuminsando pa 6 or y mey di atardi cu benta di buki di Mario Dijkhoff y Linda Richardson, pa despues continua cu e programa cu lo termina pa 9 or di anochi.
