ORANJESTAD (AAN) -- Enseñanza ta otro di e puntonan cu Clero Catolico a toca durante e reunion cu Formador y su team, den cuadro di formacion di e siguiente gobierno.
Pader Andres a papia di e experiencia cu enseñanza a pasa aden, di un tempo sumamente dificil y turbulento, y el a subraya cu Prome Minister sigur a coopera cu esaki pa tene un proceso pa por resolve e problemanan no solamente di e trahadornan di limpieza, pero tambe pa pone enfasis riba e futuro di e studiantenan di scolnan catolico y nan edificionan escolar.
Pader Andres a bisa cu ta conoci cu 85% di studiantenan na Aruba ta bay scol catolico, y mester sigui cana hunto cu gobierno pa fortifica loke ta un pilar sumamente importante di un pueblo, cual ta enseñanza.
Tambe Clero a elabora tocante e pastoral di enfermonan, unda cu ta pidi si por haya mas participacion den Hospital. Anteriormente, nan a reuni cu Minister di Salubridad y cu Director di Hospital anterior, y a haci e peticion pa haya un persona fiho cu ta traha na Hospital, manera un capeyan. Y si ta posible un capel, no solamente pa e sacerdote por reuni cu e enfermonan, pero pa nan hospitaliza wordo atendi den cuadro di pastoral di enfermo.
Tambe e ta boga pa esnan cu ta priva di libertad den prison, pa sacerdotenan por haya mas acceso pa duna atencion individual den KIA.
Y como ultimo punto, Pader Andres a elabora tocante e Sinodo cu Iglesia Catolico ta celebra universalmente, promovi pa Papa Francisco, cu prome cu bay den forma global ta wordo teni den cada diocesis. Diocesis di Willemstad tambe ta haciendo e trabao aki, y Michael Nicolaas ta e persona di contacto cu Curacao. E conferencia di e sacerdotenan ta planifica pa October y nan a elabora riba e aspecto aki tambe. Pader Andres a expresa cu Clero kier a probecha e Sinodo pa acerca nos pueblo, pa reconoce su sentimentonan, y den cierto sentido haci un sorto di encuesta tocante e sentimentonan aki, y den esaki tambe Clero kier participacion di Gobierno den forma di yuda realiza e encuesta aki, cu e meta di wak cuanto nan mester fortalece e servicio pastoral. Finalmente, a bin otro punto acerca, pa kizas logra mas autonomia, mas libertad pa Clero Catolico brinda un servicio mas optimal pa atende e necesidadnan na Aruba. No semper ta logra tur e obhetivonan, y pesey Clero di Aruba mester di cierto autonomia y midi e sentimentonan di pueblo pa wak con por planifica den futuro e trabao aki dunando mas autoridad localmente, pa asina nan por bin cu nan propio vocacionnan, y pa duna un servicio mas optimal na nos pueblo.
