Jasmira Mora, Coordinador Praktijkondersteuner Huisartsenzorg
*A pone enfasis pa tur persona controla su presion
ORANJESTAD (AAN)-- Den un entrevista cu Matutino DIARIO, Jasmira Mora, Coordinador Praktijkondersteuner Huisartsenzorg, a elabora tocante e servicio cu esaki ta encera.
El a splica cu pa algun aña caba, POH ta forma un parti hopi importante di e proyecto yama “Sa bo number”, den cual POH ta duna su aporte den e aspecto di haci chekeo di salud.
Si e instancia cu a pidi POH haci e parti di chekeo ta pidi pa nan duna lectura, tambe nan ta haci esey.
“Pa nos tabata hopi importante e samenwerking; e trahamento hunto cu Departamento di IBiSA y tambe cu DVG, pues na final di dia nos tur tin e mesun meta, cu ta e bienestar y salud di nos Arubianonan”, Mora a expresa.
El a enfatiza tocante presion halto, pasobra e ta constata cu den e chekeo di salud e presion halto ta keda un problema, y el a bisa cu tristo enberdad ta cu e edad ta bira mas jong.
“Un di e caracteristicanan mas complica of dificil, di e parti di presion halto, ta cu hopi biaha esaki no ta duna un indicacion.
“Dus, ami semper ta bisa cu un persona cu ta sinti cu tin presion halto, pasobra e por sintie, e sa cu algo no ta bon. Pero na momento cu e no tin ningun sintoma y e ta cana rond, e ta un bom di tempo, pero e persona no sa cu su presion ta halto, pasobra e no ta haci un control regular tampoco. Bo no sa bo number, manera nos campaña ta bisa. Anto, e ora ey e ta bira un situacion hopi peligroso y delicado”, Mora a indica.
El a sigui bisa cu e POHnan kier keda enfoca riba esaki pa sikiera e personanan ta keda controla nan presion. El a splica cu ora un persona ta pasa edad di 21 aña ta importante pa alomenos un biaha pa luna cuminza wak kico su sucu, su presion ta, p’asina e por tin un liña base. “Asina e por monitor con su progreso ta sigui ora e bira mas grandi, pasobra nos tur sa cu eventualmente nos tur por yega eynan. Si bo no ta cuida bo mes, si no mantene un bida saludabel, no haci ningun ehercicio, y sobre todo si bo tin’e den famia. Ora nos ta constata cu un persona tin un presion halto y mi puntre si den famia tin hende cu presion halto of otro malesa cronico, nan NO sa! Tampoco nan sa si e familiar ta be un pildo. Cosnan asina ta informacionnan importante, cu mi ta haya cu cada yiu of cada persona mester sa, pasobra mester sa si tin’e den famia, pasobra e ta un punto di atencion pa haci su control”, Mora a subraya.
