Ronella Croes, CEO di ATA:
ORANJESTAD (AAN)- Señora Ronella Croes, Director di Oficina d Turismo di Aruba, den entrevista cu Matutino DIARIO, a señala cu ATA pa añanan caba ta duna prioridad na inverti den e producto tanto fisico como humano.
“Den e producto humano bo tin cu pensa riba entrenamento cu nos ta ofrece, e servicio cu nos ta upgrade, etc., etc. Pero di otro banda, e parti fisico, bao di esey tambe nos tin prioridadnan. Claro cu ATA no por inverti den tur cos. Tur cos ta pasa un filter di con ta importante, kico ta e prioridadnan. Nos plannan a bin ta un prioridad sigur, nos siguridad, nos recurso humano, ta prioridad”, Ronella Croes a señala.
Papiando di ATA su plannan el a duna ehempel di unda ATA ta presente pa añanan. “Nos ta sigura cu tur nos awanan ta bon marca, pa haci e division entre watersport y e parti di e landadornan. Y esaki ta wordo facilita door di ATA. Algun aña pasa, ATA a introduci pa medio di Aruba Hospitality & Security Foundation, un ekipo cu nos ta yama ‘Tourism & Security Patrol Aruba’ cu ta patruya den varios caminda di nos playanan, den low rise y high rise. Y pronto nos lo amplia esaki tambe pa Arashi, Malmok, y pariba di brug cu ta inclui Mangel Halto, tambe”, CEO di ATA A señala.
El a reitera cu esaki ta atrobe, hospitalidad, servicio, vigila situacionnan, raporta y perfectamente nan ta haci esaki tambe, tur luna, y semanalmente na ATA tambe.
“Y nan ta traha den hopi bon colaboracion cu polis, y nos ta hopi agradecido cu esey tambe”, Ronella Croes a expresa.
