Minister di Economia Geoffrey Wever:
ORANJESTAD (AAN) — Minister Geoffrey Wever, Minister di Economia, den entrevista cu DIARIO a menciona cu un tema cu ta den pleno desaroyo ta e cooperacion economico cu Colombia, y e ta kere cu den corto plazo e importacion di carni pa Aruba lo keda finaliza ya cu e ta den su “ approving fase”.
Den e gobierno anterior hopi trabao preparatorio a wordo haci, y e mandatario aki mes a lidera un mision comercial unda representantenan di Ministerio Publico a uni tambe na e evento aki, nos a reuni cu tur e stakeholders di e departamento di sanidad di Colombia, cu e matadero y diferente otro organizacion, pa por a habri caminda pa esaki.
E tabata un proceso pero e ta den su fase di aprobacion, esaki pa loke ta e parti di carni. Wever a agrega cu dos siman pasa, hunto cu Minister Wyatt-Ras tabata tin encuentro cu productornan grandi di carni di galiña, cu interes pa importa pa Aruba.
“Nos ta continuamente bezig cu e tipo di esfuerzonan aki, pa trece productonan na miho prijs p’asina baha e presion un poco, y tambe den e mesun rosea rescata un poco di locual ta sosodiendo na Merca.
“Nos ta bezig cu Colombia y esaki ta, keto bay, den desaroyo, bo ta wak cu ta cosnan cu ta tuma tempo, pero nan ta materializando y bo ta wak cu tin interes di sector priva y tin interes di e pais mes”, Minister Geoffrey Wever a enfatiza.
