Pader Hose Nava a splica:
ORANJESTAD (AAN) – Pader Hose Miguel Nava, den entrevista cu DIARIO, a referi na e encuentronan spiritual cu a cuminsa dia 2 di juni awo, te cu Diadomingo proximo dia 8 di Juni.
Mañan dia Diaranson 4 di Juni, na Misa Immaculada Concepcion na Santa Cruz, Anochi di 8’or te 9.30’or tin un encuentro titula: “Resucita pa e forza di Spirito”, organiza pa Instituto Kateketico Diosesano Aruba (IKDA).
Pader Nava a bisa cu esaki ta e final di Pasco di Resureccion. “E ultimo Diadomingo di tempo di Resureccion, y esaki ta dedica na Pentecost, na e momento cu Spirito Santo a baha riba e Discipelnan; e cuminzamento di e Iglesia, e cuminzamento di e Obra cu Hesus a laga den su Apostelnan.
“E ta un momento hopi importante pasobra e Apostelnan a haya e uncion. Nos kier hala atencion un biaha mas. Aña pasa nos a cuminza cu e siman aki, y e siman aki nos kier sigui cu e momento special aki, como Iglesia na Aruba, unda nos kier hala atencion riba e importancia di nos identidad catolico. Specialmente Spirito Santo, ora Hesus a priminti su compania cu nos, cu Spirito Santo ta siña nos, tur cos. Pero tambe cu e ta bay recorda tur cos cu Hesus a siña nos”, Pader Hose Nava a expresa.
El a agrega cu pa motibo di esey nos por wak den e contexto di nos historia universal, pero tambe di nos historia local con e FE Catolico Cristian a trece hopi cos bon den cada pueblo.
“Si nos ta mira aki den nos Isla, cuminzamento di Hospital tabata den man di soernan, tambe nos tin scol bao man di Iglesia Catolico, y nos no por mira Aruba so, nos por mira tur e parti di America, Latino America, universidadnan cu a nace for di e man di Iglesia Catolico, mustrando asina con e conocemento, e saber, e ciencia, ta bay tambe en relacion cu nos Religion Catolico, Pader Hose Nava a señala.
