ORANJESTAD (AAN)- Desde aña pasa e team di maneho di Æ-2020 Aruba Entertaiment tabata bezig cu e statutonan, pa asina por a formaliza nan pa Aruba Entertainment 2020. Asina señor Ofo Escudero a duna di conoce, den conferencia di prensa.
El a bisa cu nan ta hopi contento cu Notario Helmeyer a haci e tramite mas facil pa nan, pa loke ta tur e contenido y splicacionnan tocante e statutonan, y nan ta hopi gradici cu por fin, Aruba Entertainment 2020 ta completamente formaliza.
Den e conferencia di prensa aki tabata presente e miembronan di e directiva 2020-2021. Tambe el a gradici mr. Henry Baarh, cu ta nan “leader affairs”, pa tur su experticio; un persona cu sa di Ley y cu a yuda nan den henter e proceso y cu ta bay keda cu nan, pa tur loke nan haci keda dentro di loke ley ta prescribi.
Ofo Escudero a menciona cu ainda Aruba ta den un pandemia, na unda cu e parti primordial di Æ-2020 Aruba Entertainment ta pa mayoria di nan hendenan tin trabao.
“Manera boso sa, noticianan a cay un tiki fastioso, specialmente pa e mundo di entretenimento. Nos no kier cuestiona locual a pasa na Hospital, esey ta alarmante, y nos ta conciente y di acuerdo cu cierto medidanan mester bin, pero na nos parecer e por mustra, un biaha mas, cu ta solamente caminda cu tin entretenimento esey ta ocasiona cu ta bin cosnan asina. Tampoco nos kier cuestiona, pasobra Crisis Team sa di unda e origen di e contagio ta. Den pasado esaki a yega di sosode caba, y nos a discuti y mi tin cu bisa cu nos a uni tambe hunto cu e representantenan di AMA (Asociacion Musiconan Aruba) y miembronan di Musica, unda cu nos a sinta y a mustra tambe, Crisis Team, cu e sistema ey no ta funciona, pasobra e unico cu lo no tin aworaki ta e bandanan en bibo”, Ofo Escudero a indica.
El a señala cu e multitud y e fiestanan ta bay sigui y tur lugar lo sigui mesun yen cu musica di Youtu. “Nos lo sigui presencia, y nos a discuti esaki caba, pero ta hopi importante pa nos laga sa na pueblo di Aruba, cu nos ta hopi conciente y ta dispuesto na yega na solucionnan pa baha e contagio, aworaki cu e variante Delta aki, ta haciendo un desastre. Nos ta full di acuerdo cu esey, pero semper, mi ta kere por tin un miho manera pa no perhudica, atrobe, esnan cu pa mas cu un aña caba, a perde tur tipo di entrada”, Ofo Escudero a señala.
El a agrega cu e ta kere cu Crisis Team a bat un tiki na extremo cu Æ-2020 Aruba Entertainment e ta pensa cu si nan, alomenos, por a lague na tres pa cinco hende, y cu cierto restriccionnan.
Mester corda, el a subraya, cu hopi di nan ta esnan cu ta traha den hotel mas tanto, y esnan cu ta biba di dje por tabata tin un poco di sosten di parti di e hotelnan, pasobra e no ta kere cu e brote ta bin di hotelnan. Esey lo por a yuda cu toch na hotel por a presenta tres of cuater hende cu a haci e dolor aki, un tiki menos.
