ORANJESTAD(AAN): Impact Hub Aruba Foundation ta lansa oficialmente Impact Talent Accelerator,
un programa inovador pa desaroyo di forsa laboral cu ta duna respuesta directo y concreto na e escases creciente di trahadornan cualifica den nos mercado laboral.
Durante un conferencia di prensa, General Manager di Impact Hub Aruba Foundation, Sra. Mary-Ann Falconi-Rasmijn a elabora riba e situacion actual di mercado laboral na Aruba. Segun Sra. Falconi-Rasmijn, Aruba ta enfrenta un situacion urgente den su mercado. Encuesta reciente conduci pa Camara di Comercio (2024), y investigacionnan adicional conduci pa Impact Hub Aruba (2025) ta indica cu:
76% di empresanan tin dificultad pa haya trahadornan cualifica
62% ta considera e problema como severo
54% ta anticipa cu e situacion lo bira peor den e proximo 1-2 aña
34.2% a menciona un mismatch den skills, 38.4% un gap den educacion y training, y 54.4% limitacion den talento local.
For di entrevistanan conduci cu stakeholders tambe ta indica cu e desbalanse ta primordialmente den e ‘werkhouding y gedrag’ , expectativa di salario diferente, un desbalanse den educacion y industria, pa menciona algun. Adicionalmente, Aruba ta mira un ‘vergrijzing’ acelera di su forsa laboral, cu mas di 8.700 persona entre 60-64 aña cu lo drenta edad di pensioen den un futuro cercano. Ta existi tambe un nivel limita di participacion laboral den hoben cu ta riba bijstand, hende muhe y adulto mayor, y e fenomeno di migracion intelectual ta sigui debilita e base di talento local.
Sra Falconi-Rasmijn ta añadi “E topico aki ta un problema global. Pero Aruba como un isla chikito y cu diversifacion economico ainda limita, ta pone nos den un situacion mas delicado. Nos proposito no ta pa crea panico, pero sigur pa nos ta mas conciente cu e momento di trece solucion duradero y cambia e narativa aki, ta awo! E impacto economico y social por ta uno severo pa nos isla”.
Como respuesta directo na e desafio aki, Impact Hub Aruba a desaroya un programa inclusivo cu ta combina formacion basa riba necesidad di mercado laboral, entrenamento practico, job-coaching y ‘apprenticeship’ pa prepara talento local pa oportunidadnan laboral actual y di futuro. E programa tin un duracion di 8 siman, dividi den dos trayecto principal; trayecto preparatorio cu ta consisti di training, workshops y simulations, y trayecto di ‘apprenticeship’ cu ta entrenamiento structural den un organisacion.
Mester remarca cu e sector cu mas ta sinti efecto ta e sector di hospitalidad y turismo. CEO y Presidente di AHATA, Sra. Tisa LaSorte, a uni forsa cu Impact Hub Aruba den haci e programa aki realidad. Sra. LaSorte ta elabora, “Pa AHATA, e programa aki a conecta cu AHATA su mision pa e sector cu nos ta representa. Algun aña pasa AHATA a introduci un proyecto similar, pues nos sosten na e programa di Impact Talent Accelerator ta cuadra cu AHATA su mission y vision”. Sra. LaSorte a sigui splica cu e programa aki ta demostra di ta inovador y cu ta crea un solucion directo pa cu e desafio cu nos mercado laboral ta experiencia.
Pa Ken E Ta
Impact Talent Accelerator ta habri pa diferente grupo den nos comunidad cu ta consisti di personanan cu no tin trabou, personanan recien gradua y cu ta buscando trabou, personanan cu kier ‘upskill’ of ‘re-skill’. Tambe companianan por registra nan trahadornan cu ta riba trayectoria di promocion pa yuda enforsa nan preparacion.
Tur participantenan lo haya coaching personalisa, experiencia laboral, y oportunidad pa conecta directamente cu sector laboral durante eventonan di Job Speed Dating.
Organisacionnan por registra pa ricibi acceso na talento, pa tin aceso na sessionnan informativo riba topiconan esencial pa e dunado di trabou, y ofrece oportunidad di ‘apprentice’ den nan organisacion.
Pa aplica of registra online, bishita impact-talent.net. Pa personanan cu no tin empleo, participacion ta gratis. Pa esnan cu kier re-skill/up-skill tin un costo simbolico di AWG 250.
Un Yamada pa Sector Priva
Impact Hub Aruba ta invita lider y organisacionnan, sea sector priva of companianan estatal, pa forma parti di e movecion aki. E programa no ta un formacion tradicional, sino un acelerador real pa prepara talento segun e realidad y necesidad di Aruba. E colaboracion entre Impact Hub Aruba y partnernan strategico ta importanta pa crea un ‘pipeline’ constante di talentonan cu ta cla pa trece balor real den sectornan cu tin e necesidad.
Impact Hub Aruba ta gradici partners y sponsors cu ta kere den e programa. Specialmente partner principal AHATA cu a demostra liderazgo representando e sector clave di Turismo y Hospitalidad. Gradicimento ta bay na demas patrosinador cu ta Qredits y tur otro partner cu ta contribuyente na Impact Talent Accelerator.
