ORANJESTAD (AAN): Den fin di siman, Partido Red Democratico a duna clarificacion riba acuerdo di cooperacion pa desaroyo di idioma Papiamento.
Den relacion cu e acuerdo di cooperación firma entre Aruba y Curaçao tocante e desaroyo y promoción di e idioma Papiamento, nos kier aclara cu no ta e actual Ministro di Enseñansa, Gerlien Croes, pero cu tabata e ex-Ministro di Enseñansa, Dr. Rudy Lampe, kende a representa Aruba oficialmente na e firma di e acuerdo.
E acuerdo, titula “Samenwerkingsovereenkomst Aruba & Curaçao”, a ser firma dia 24 di augustus 2018 pa Dr. A. R. Lampe, kende na es momento tabata Minister di Enseñansa, Ciencia y Desaroyo Sostenibel di Aruba, hunto cu su contraparte for di Curaçao, Señora Drs. M. Alcala-Walle.
E documento ta pone enfasis riba e importancia di fortalece e idioma Papiamento den un contexto regional y ta establece colaboracion riba varios area manera política linguístico, desaroyo curricular, investigacion y formacion di docente. Aruba, dor di su Dirección di Enseñanza, a demonstra compromiso firme cu esaki, y ta activa den proyecto manera *Proyecto Idioma den Enseñansa* cu ta traha riba normalisacion y promocion di Papiamento den e sistema educativo.
Red Democratico ta pone enfasis cu e Dirección di Enseñansa ta na altura di e compromiso asumi den e acuerdo, y ta sigui traha den cooperacion cu entidadnan homologo di Curaçao y otro partinan relevante, pa promove e idioma Papiamento na un manera integral y sostenible.
