Impact Hub Aruba y One Caribbean Business Network ta bay colabora

Asina ta amplia oportunidad regional pa emprendedor nan local

ORANJESTAD (AAN): Impact Hub Aruba a firma un MOU cu One Caribbean Business Network (OCBN), estableciendo un colaboracion strategico pa amplia e red regional y crea mas salida pa emprendedornan di Aruba den un mercado Caribeño cu ta sigui desaroya, y tambe facilita acceso pa emprendedornan Caribeño cu ta interesa den orientacion y entrada na mercado di Aruba.

   E aliansa nobo ta habri un porta importante pa conectividad empresarial entre Aruba y e region. Impact Hub Aruba y OCBN lo traha hunto pa facilita intercambio di conocemento, visibilidad pa emprendimentonan nobo, acceso na evento y plataforma regional, y promocion di oportunidadnan di negocio den un mercado mas amplio.

  Segun Señora Mary Ann Falconi-Rasmijn, Co Fundadora y General Manager di Impact Hub Aruba, e colaboracion ta un paso natural den e direccion di crecimiento: “Nos a cuminsa crea oportunidadnan pa nos emprededornan drenta mercado di Merca den aña 2025. Pa aña 2026, nos ta amplia e oportunidad pa mercado Caribense. Nos ta mira Caribe como un espacio di intercambio y posibilidad economico hopi cerca di cas. E aliansa cu OCBN ta crea caminda nobo pa nos emprendedornan, y ta fortalece e meta pa conecta talento local cu oportunidad regional y internacional.”

   Pa Aruba Liaison di One Caribbean Business Network, Señora Giandra de Cuba, esaki ta un otro logro pa OCBN pa amplia e apoyo cu ta duna na su miembronan como tambe un red di profesionalnan den Caribe. “OCBN ta dedica na crea un Caribe uni den hacimento di negoshi y na amplia oportunidadnan den nos region. E acuerdo aki cu Impact Hub Aruba, ta fortalece nos mission y nos ta contento di por traha hunto den 2026,” el a declara.

   Finalmente, e colaboracion cu Impact Hub Aruba y OCBN ta consolida esfuerzonan mutuo den fortalece crecimento economico den region Caribe. E acuerdo ta facilita conectividad directo entre emprendedornan Arubano y empresa y institucionnan regional, participacion den evento, mision comercial y programanan di aprendizahe, intercambio di conocemento riba tendencia di mercado den Caribe y promocion di colaboracion entre sector creativo, cultural, tecnologico y comercial

Impact Hub Aruba ta mira e aliansa como un complemento pa su programanan pa Startups, incluyendo O STAD Incubator, y diferente programanan di desaroyo di capacidad. E colaboracion ta crea mesun espacio pa un generacion nobo di fundador cu ambicion pa opera den un mercado mas amplio.

Den comienso di aña 2026, Impact Hub Aruba y OCBN lo anuncia  mas detaye di iniciativa y oportunidadnan cu e acuerdo lo habri pa comunidad di emprendemento.