ORANJESTAD (AAN): Impact Hub Aruba ta duna un paso importante den su strategia pa conecta ecosistemanan
di emprendemento y innovacion den Caribe Hulandes y Hulanda. Cu firma di dos Memorandum of Understanding (MoU) cu Curaçao Innovation Hub y Dutch Caribbean Innovation Fund, e organisacion ta avansa den su ambicion pa crea un red regional mas conecta, cu mas oportunidadnan comercial pa startupnan y scaleupnan.
E dos acuerdo ta marca un avance concreto den e trabou continuo di Impact Hub Aruba pa transforma relacionnan strategico den colaboracionnan structural cu por beneficia emprendedornan di diferente isla. E acuerdo a wordo firma durante bishita di Minister di Economia di Hulanda, Sra. Heleen Herbert, den conexion di inauguracion di Curacao Innovation Hub.
Di Aruba pa Curaçao: colaboracion den practica
E acuerdo cu Curaçao Innovation Hub ta establece un colaboracion directo entre e dos organisacionnan, cu enfasis riba habri acceso mutuo na nan rednan, stakeholdernan y oportunidadnan comercial.
E partnernan lo traha continuamente pa conecta nan comunidadnan empresarial, colabora riba eventonan y programanan, alinea nan strategianan di innovacion y desaroya actividadnan regional hunto.
E meta ta pa startupnan y scaleupnan di ambos isla por beneficia di un ecosistema mas amplio, cu mas acceso na conocemento, partnernan y mercado.
Un aliansa pa conecta Caribe Hulandes y Hulanda
Impact Hub Aruba a firma tambe un MoU cu Dutch Caribbean Innovation Fund, cu e meta di establece hunto den e proximo 12 luna, e Dutch Caribbean Innovation Alliance.
E iniciativa ta dirigi riba conecta ecosistemanan independiente di emprendemento y innovacion den Caribe Hulandes y Hulanda, respetando nan identidad y creando un base pa colaboracion, intercambio di conocemento y acceso na oportunidadnan comercial.
E aliansa ta aspira pa crea mas escala pa startupnan y scaleupnan, aumentando nan potencial di crecimiento y haci nan mas atractivo pa posible inversionistanan. For di un mercado chikito local, e ta habri caminda pa inclui mercado regional di islanan caribense hunto.
Segun Mary-Ann Falconi-Rasmijn, Directora di Impact Hub Aruba, “pa un economia chikito manera Aruba, acceso na mercado mas grandi ta esencial. Nos ta traha activamente pa construi e aliansa y conexionnan cu por permiti nos startupnan y scaleupnan crece mas aya di nan mercado local. Ora nos conecta nos ecosistemanan, nos ta crea mas oportunidad pa crecimiento, expansion y inversion.”
Construyendo un ecosistema regional mas inclusivo
Pa Impact Hub Aruba, e importancia di e dos acuerdo aki ta den e oportunidadnan cu nan por crea pa un comunidad empresarial mas amplio.
E organisacion ta comprometi na un ecosistema unda acceso na mercado, conexionnan strategico y oportunidadnan internacional no ta limita na un grupo selectivo, sino cu mas emprendedornan por beneficia di nan.
Cu e dos aliansa aki, Impact Hub Aruba ta fortalece su rol como un organisacion cu ta conecta ecosistemanan, acerca partnernan y contribui activamente na un futuro economico mas conecta pa Aruba y e region.
