ORANJESTAD (AAN): Durante prome sesion informativo na YMCA San Nicolas,
Prome Minister a destaca e trayectoria di e iniciativa legislativo y e importancia di brinda sosten concreto na mayornan
Prome Minister Mike Eman, hunto cu colega Minister di Asunto Social Mervin Wyatt-Ras, a participa diamars anochi na e prome sesion informativo relaciona cu e proposicion di ley pa brinda sosten financiero na famianan cu muchanan cu necesidad intensivo di cuido. E encuentro, cu a tuma luga na YMCA San Nicolas, a brinda mayornan oportunidad pa ricibi informacion tocante e iniciativa legislativo y e sosten cu Gobierno di Aruba ta propone.
Durante e sesion, Prome Minister Eman a enfatisa cu e proposicion di ley ta representa un paso importante den e esfuersonan pa atende e necesidadnan di famianan cu ta enfrenta gastonan adicional como consecuencia di e cuido specialisa cu nan yiunan ta rekeri.
Segun Prome Minister, pa hopi di e famianan aki, e responsabilidad diario di cuido ta bay acompaña cu desafionan financiero considerabel. Tratamentonan specialisa, terapia, ekipo adapta y otro forma di asistencia intensivo por representa gastonan cu ta dificil pa cubri, particularmente ora cu e necesidad di cuido ta continuo.
Un iniciativa cu a cuminsa na 2021
Prome Minister Eman a recorda cu e trayectoria di e proposicion di ley a cuminsa na 2021, ora cu e, hunto cu Mervin Wyatt-Ras, a presenta un iniciativa legislativo na Parlamento pa atende e situacion di famianan cu muchanan cu necesidad special.
E iniciativa a sigui desaroya durante e añanan siguiente y, segun Prome Minister, a haya un impulso adicional despues di formacion di Gobierno actual, cu e meta di logra un marco legal pa brinda e asistencia financiero.
Recientemente, e proposicion di ley a keda entrega na Parlamento pa su tratamento. Gobierno ta aspira pa e medida por drenta na vigor na januari 2027, suheto na aprobacion di e legislacion.
Sosten mensual pa atende gastonan adicional
E proposicion di ley ta contempla un sosten financiero di Afl. 500 mensual pa cada mucha cu ta cumpli cu e condicionnan estableci, cu e proposito di contribui na e gastonan adicional relaciona cu necesidad intensivo di cuido.
Prome Minister a splica cu e asistencia ta destina pa brinda alivio na famianan cu mester cubri diferente tipo di gasto na bienestar y desaroyo di nan yiunan.
E sosten presenta ta parti di un esfuerso mas amplio pa fortalece e red di proteccion social, reconociendo cu famianan cu muchanan cu necesidad intensivo di cuido por enfrenta circunstancianan cu ta rekeri asistencia adicional.
Dialogo directo cu mayornan
Durante e sesion informativo na YMCA San Nicolas, mayornan a haya oportunidad pa informa nan mes tocante e proposicion di ley y e manera cu e asistencia ta proyecta pa funciona.
E encuentro a forma parti di e proceso di comunicacion cu comunidad, pa brinda claridad tocante e iniciativa y scucha e inkietudnan di famianan cu por bin na remarca pa e sosten.
Prome Minister Eman a destaca e importancia di mantene e dialogo aki, specialmente considerando cu e realidad di cada famia por ta diferente y cu e necesidadnan di cuido por varia considerablemente.
Un segundo sesion informativo ta programa pa diahuebs 5 di november, di 7:00 PM pa 9:00 PM, na MFA Paradera, caminda comunidad lo haya otro oportunidad pa ricibi informacion y haci pregunta. Registracion ta cuminsa pa 6:30 PM.
Compromiso cu bienestar di famianan
Prome Minister Eman a expresa satisfaccion cu e iniciativa cu a cuminsa varios aña pasa a logra avansa te na e fase actual di tratamento parlamentario. El a destaca e colaboracion cu Minister Wyatt-Ras y e perseverancia pa atende un necesidad cu, segun e, ta afecta directamente calidad di bida di hopi famia.
E iniciativa ta conecta cu e vision di Bon Comun, den cual bienestar di comunidad, solidaridad y responsabilidad comparti ta ocupa un luga di prioridad.
Cu e proposicion di ley actualmente na Parlamento, e siguiente paso ta e tratamento legislativo necesario pa determina su aprobacion y eventual entrada na vigor.
Gobierno di Aruba ta continua su esfuersonan pa informa comunidad tocante e medida presenta, cu e obhetivo cu famianan interesa por compronde e posibilidadnan di asistencia y e condicionnan cu lo aplica una bes aproba e ley.
