Dr. Joyce Pereira:
ORANJESTAD (AAN): Den cuadro di Dia Internacional di Idioma Materno, Fundacion Lanta Papiamento conhuntamente cu Fundacion Rancho a organisa un lectura riba Papiamento.
Dr. Joyce Pereira tabata un di e oradonan invita y el a elabora riba dicon Papiamento mester ta e idioma di mas importante den enseñansa multilingual na Aruba y e ta conecta esaki cu e lema di UNESCO e aña aki: Enseñansa Multilingual necesario pa transformacion den enseñansa. Idioma materno ta e aspecto di mas importante cu ta determina nos como hende. E ser humano so tin un medio, un herment asina sofistica cu e ta uza pa pensa, pa comunica, pa argumenta, pa conceptualisa, inventa, siña, expresa, a bisa.
Pereira a agrega cu tur idioma na mundo tin e funcionnan aki. Tur idioma tin un gramatica (reglanan), un vocabulario, y un manera pa pronuncia y tur esey ta haci cada idioma unico. "Niun idioma no ta mihor of mas bunita of mas importante cu otro.
Pa cada pueblo su idioma ta un tesoro bibo masha grandi mes. Ta via su idioma, un pueblo ta pasa conocemento, historia, cultura di un generacion pa otro. Te hasta asina cu ora un idioma muri, pa henter un cultura, historia, herencia a bay perdi", asina Dr. Joyce Pereira a señala.
Neglisha of hasta bringa idioma materno pa un mucha of un pueblo no ta nada otro cu un crimen cometi contra derecho di mucha, contra derecho humano. Hopi documento di UNESCO y di cientificonan nacional y internacional ta enfatisa esaki, el a splica.
Den un otro secuencia di articulonan DIARIO lo trece mas informacion valioso dilanti tocante e importancia di idioma materno.
