Directora di SKOA, Anuesca Baly:
ORANJESTAD (AAN) –Anuesca Baly, den entrevista cu DIARIO, a amplia tocante e costo di bida awendia, di cual e sector di enseñanza no ta scapa y el a referi tambe na e costo extra cu airco na scol ta nifica, y cu e ta un necesidad, no un luho!
Educacion semper tabata y ta costoso. Temponan di antes tabata caro caba, pero e ta parce barata si compare cu actualmente. Sea pa motibo di guera, of door di e economia mes, na henter mundo tur cos ta subi di prijs y mester tene cuenta cune.
Baly a expresa cu, lamentablemente, no ta den su man, ni di ningun hende, cu si costo di bida subi salario tambe. Y mester wak kico e prioridadnan ta.
“Educacion ta costoso!” Baly ta reitera. Den cas mes, un studiante di Colegio EPI, su bukinan ta caro. Si e bay Universidad di Aruba, su bukinan tambe ta caro. Hopi biaha e studiantenan ta inverti den nan mes, haciendo un fianza pa nan estudio. Kiermen, educacion ta costoso sea si ta wordo haci online, via homeschooling, etc., e tin costo cune. Tur cos ta depende cuanto e mayor por paga pa su yiu tin un bon educacion. El a subraya cu tin scolnan na Aruba pa cual mayornan ta paga entre ocho mil cu binti mil florin pa aña, pero tin scolnan unda ta paga menos pasobra esey ta locual nan tin, y esey no ta kita cu nan ta haya un bon educacion.
“E educacion cu nos ta duna nos ta zorg pa e ta un bon educacion pa nos alumnonan, pasobra con cu bay bin nan ta e Aruba di futuro. Nos ta inverti den nos alumnonan, pero tambe nos mester di e fondonan pa nos por inverti”, Anuesca Baly a remarca.
AIRCOGELD:
Directora di SKOA tambe a señala cu e scolgeld no ta pa paga Elmar pa uso di airco na scol, cu tambe ta inclui servicio di mantenimento. Pa coriente SKOA ta haya cierto suma, pero e no ta yega pa cubri tur cos. Scolnan ta paga pa airco un tarifa mas halto cu comunidad, normalmente. Pesey mayornan ta paga e aircogeld banda di scolgeld.
Baly a comenta cu tin mayornan ta bisa cu tempo di nan tempo no tabata tin airco na scol. El a recalca cu tempo di su tempo tampoco! Pero tabata tin menos cas, menos sonido pafo, y awendia no por ni pensa di traha den un klas local sin airco. “Airco no ta un luho mas, e ta un necesidad. Y banda cu e ta un necesidad e ta bin cu su costonan tambe. Airco mester haya servicio, vooral si e ta cendi minimo ocho ora tur dia, na scol. Tur e cosnan aki mester tene na cuenta cu ta costonan, y aunke bo ta bay cu airco cu ta inverter e ta gasta coriente y e mester haya servicio. Esey ta aspectonan cu nos no por kita afo cu ta gastonan extra y cu ta un necesidad”, señora Anuesca Baly, directora di SKOA a conclui.
