SANTO DOMINGO: Nan tin e evento planea pa Diadomingo 31 di October venidero, y debi na reglanan valido ainda pa mitiga brote di Coronavirus,
e competencia lo bay ta uno hopi cortico, y lo no tin tampoco competencia di trahe tipico, di talenti, ni reality show.
Pero porfin despues di asina hopi tardanza, y cu fanaticonan ancioso, e organizacion di Miss Republica Dominicana Universo cu ta bao direccion di e experto di reinanan Magali Febles, a bisa cu e certamen grandi lo ta dia 31 di October na Santo Domingo mes.
E biaha aki, e candidatanan pa Miss Republica Dominicana Universo 2021 mester tin nan prueba valido cu nan a haya vacuna contra Covid-19 y mester ta studiando of tin un carera universitario.
“Esaki lo bay ta e mihor certamen cu mi ta organizando, y e ta un oportunidd grandi pa hobennan. E certamen lo bay ta mas cortico cu normal,” segun Magali Febles a indica.
E certamen lo bay ta transmiti via Color Vision canal 9.
Como ganadora nan ta buscando un hoben cu personalidad y compromiso pa su pais y cu ta gusta obranan social, y ta cla pa keda ricibi training, y ta un hoben dispuesto pa dedica su mes den su training pa representa su pais na nivel internacional.
E ganadora lo bay representa e pais na December venidero na Miss Universe 2021 cu lo tuma lugar na Eliat na Israel.
