ORANJESTAD (AAN): Den un entrevista e siman aki cu Frans Ponson, kende ta di e grupo di ‘Comerciantenan Uni’, el a manda deseonan di exito na tur Partido Politico cu otro siman ta participando den eleccion na Aruba.
Y e topico di mas importante ta e debe grandi cu Aruba tin. Ta normal pa un pais crea debe danki na inversionnan haci, pero ultimo añanan por a nota cu e debe riba e isla aki a bay for di control, y el a empeora danki na e pandemia.
Aruba a firma cu Hulanda pa haya tranche cu ta yuda liquidez di Gobierno, pues e asunto di debe awor a bira extra serio.
Segun Ponson, e ta spera cu cualkier Gobierno nobo lo bay tuma esaki hopi na serio, y cu lo tin di enberdad atende varios punto cu pa decada largo hopi gobernacion a nenga di mishi cu nan, principalmente e reduccion di gasto di e aparato gubernamental.
El a bisa cu Comerciantenan Uni ta kere cu enberdad a yega e momento pa e isla haci esaki serio, y Gobierno mester sali di biaha y pone un maximo di empleado cu por tin den e aparato gubernamental, y stipula e plafond di cantidad di ambtenaar.
Pues publicamente anuncia cuanto trahador tin riba payroll aworaki, y aki pa cada departamento pueblo tin di haya informacion ta cuanto ambtenaar tin den servicio. Y asina haciendo un investigacion, lo por haya sa ta cual departamento mester di mas ambtenaar. Segun Ponson, tur e informacion aki mester ta publico.
E ta haya tambe cu Gobierno tin di pone na informacion publico tur nomber di ambtenaar cu ta drenta den dienst.
“Pueblo mester sa, pasobra e ta un derecho, como cu e ta asunto di Gobierno di Aruba cu ta publico,” Ponson a bisa.
Ademas di esey, e ta haya cu di berdad Gobierno nobo tin di bay traha fuerte riba diversificacion di economia. E ta algo posible, y tin di trece inversionistanan di exterior pa Aruba, y asina check e leynan fiscal, y e reglamentonan di Banco Central.
Segun Ponson, tin di elimina si e bottlenecks ridiculo cu ainda ta existi na Aruba, unda cu tur Banco tin miedo, y bo no por ni habri un cuenta di banco na Aruba sin un screening asina profundo.
“Regulacion ta bon, pero e no mester bay te na un nivel cu e ta stroba inversionnan di drenta Aruba,” Ponson a bisa.
Ademas e ta haya cu e Gobierno nobo tin di sinta cu tur gremio y bin cu un regla cu minimo 2 biaha pa aña ta sinta pa delibera riba desaroyo di e pais. Asina por intercambia di informacion, y papia riba problemanan y tambe red-tape cu ainda ta existi.
Aunke Gobierno a haci hopi cambio awor pa elimina redtape den Departamento di Asuntonan Economico, toch segun Ponson, tin ainda hopi retrazo pa comerciantenan cu kier habri negoshi. Ta imposible pa bo haya cierto permiso rapidamente, pasobra nan ta dura kizas 2 aña prome cu e vergunning ta cla.
Segun Ponson, Comerciantenan Uni mes lo desea un encuentro regular asina cu Gobierno nobo, pa asina mustra punto-pa-punto tur problema cu keto bay nan ta topa cune, y cu lo por yuda e Gobierno nobo elimina algun bottlenecks.
