ORANJESTAD (AAN) – Den conferencia di prensa tocante e evento “Youth Entrepreneur Summit” cu a wordo anuncia den conferencia di prensa,
conduci pa Minister di Economia Geoffrey Wever, Louella Croes di Seccion IDEA, cu ta un di e partnernan cu ta organizando e Cumbre, a hiba palabra.
Louella tin e funcion di Beleids Medewerker na Departamento di Economia, den e Unidad di IDEA. Idea kiermen “Iniciativa pa Desaroyo di Empresanan Arubano”. Louella Croes a splica cu IDEA ta un centro cu ta duna hopi informacion, na personanan cu kier cuminza un negoshi of cu tin un negoshi existente caba y kier desaroya nan actividadnan comercial, y tambe nan ta duna hopi informacion encuanto e parti di educacion tambe.
“E roll di IDEA durante e dos dianan di ‘Youth Summit’ ta cu nos ta bay presenta e parti di ‘youth entrepreneur’ y nos lo siña nan tambe con pa traha un ‘business plan’, riba e nivel di hubentud. Den pasado caba nos a dedica hopi proyecto na youth entrepreneur, pasobra nos ta pensa cu for di chikito caba mester educa nan riba e parti di entrepreneurship, pasobra algun dia cu nan ta bay studia afo, nan no por pensa solamente cu nan mester traha pa otro hende, pero cu nan por traha pa nan mes tambe”, Louella Croes a señala.
El a subraya cu IDEA ta kere den proyectonan asina pa mucha y hoben, pa cuminza educa nan for di chikito riba e parti di entrepreneurship. IDEA ta hopi contento y gradici di a haya e honor di a wordo invita pa participa den e proyecto aki, Louella Croes a comenta.
